QR Ulttyq kitaphanasynda QR Qoǵamdyq damý ministri QR Darhan Káletaevtyń tóraǵalyǵymen «Daryn» Memlekettik jastar syilyǵyn taǵaiyndaý jónindegi komissiianyń qorytyndy otyrysy bolyp ótti, dep habarlaidy QazAqparat.
Komissiia jumysyna QR Parlamenti Májilisiniń depýtattary, mádeniet jáne óner qairatkerleri, memlekettik organdar, buqaralyq aqparat quraldary, azamattyq sektor ókilderi qatysty.
Otyrysty ashqan QR Qoǵamdyq damý ministri Darhan Káletaev 2018 jyly «Daryn» Memlekettik jastar syilyǵynyń mólsheri 3 esege artyp, ár nominatsiia boiynsha 600 myń teńge úlestiriletin jetkizdi.
Usynylǵan úmitkerlerdi qarastyrǵan komissiia músheleri 2018 jylǵy «Daryn» Memlekettik jastar syilyǵynyń laýreattaryn anyqtady. Syilyqaqyny berý týraly sheshim ony Qazaqstan Respýblikasynyń Úkimeti qabyldaǵan sátten bastap kúshine enedi jáne jeńimpazdar aǵymdaǵy jyldyń jeltoqsan aiynda ótetin saltanatty rásim barysynda marapattalatyn bolady.
Biylǵy jyly aitýly marapatqa ótinim bildirgenderdiń sany rekordtyq mejege jetti, naqtyraq aitqanda 301 ótinish kelip túsken. Onyń ishinde 271 ótinim qabyldanyp, qaraldy.
Nominatsiialar boiynsha kelip túsken ótinishter sany kelesidei: «Teatr jáne kino» - 41, «Jýrnalistika» - 15, «Ádebiet» - 18, «Sport» - 37, «Estrada» - 21, «Klassikalyq mýzyka» - 17, «Halyq shyǵarmashylyǵy» - 20, «Dizain jáne beineleý óneri» - 17, «Ǵylym» - 48, «Qoǵamdyq qyzmet» - 37 ótinish. 2016 jyly-126, 2017 jyly- 213 ótinim kelip túsken.
Qazaqstan Respýblikasy Parlamentiniń depýtaty, Olimpiada chempiony, Daryn syilyǵy boiynsha komissiianyń «Sport» sektsiiasynyń jetekshisi Serik Sápievtiń paiymdaýynsha, atalǵan syilyq Qazaqstan jastaryn qoǵam men memlekettiń igiligi jolynda jańa jeńister men jetistikterge jigerlendiredi.
«Men ózim «Daryn» syilyǵynyń laýreaty boldym. Atalǵan syilyqty alǵandar úshin ǵana emes, sonymen qatar syilyqqa usynylǵandarǵa da úlken shabyt beredi. Jastar ózderiniń qatarlastarynyń jetistikterge jetip, syilyqqa ie bolyp jatqandaryn kórip, olarda belgili bir nátijege jetý jolynda kúsh-jigerlerin salatyn bolady», - dedi Serik Sapiev.
BUU Jas kóshbasshylar qaýymdastyǵynyń múshesi, «CentrAsia Group» holdinginiń bas direktory, komissiia múshesi Oljas Súleimenovtiń aitýynsha, «Daryn» syilyǵynyń deńgeii jyl saiyn artyp keledi.
«Búgingi komissiia jumysyn óte qarqyndy, ashyq pikirtalas túrinde ótti dep aitýǵa bolady. Barlyq úmitkerler laiyqty. Bizdiń elimizde ártúrli salalarda jáne árqaisysy óz salalary boiynsha tabysty bolǵan kóptegen jastar bar ekendigin maqtan tutamyn. Komissiianyń múshesi bolý úlken qurmet. Meniń oiymsha, «Daryn» memlekettik syilyǵynyń deńgeii jyl saiyn artyp keledi», - dedi O.Súleimenov.
Esterińizge sala keteiik, «Daryn» Memlekettik jastar syilyǵy jyl saiyn jastardyń ǵylym, shyǵarmashylyq, qoǵamdyq qyzmet, sondai-aq joǵary sporttyq jetistikterine qoldaý kórsetý maqsatynda tabystalady. «Daryn» syilyǵynyń jeńimpazdaryna Qazaqstan Respýblikasy Úkimetiniń qaýlysymen Daryn memlekettik jastar syilyǵynyń laýreaty» ataǵy beriledi jáne olar diplommen, tósbelgilermen jáne aqshalai syilyqtarmen marapattalady.
