Tanymal shahmatshy Dármen Sádýaqasov Reseiden qaityp kelgen Bibisara Asaýbaevany bala kezinde arnaiy testten ótkizgen, dep jazady QazAqparat.
«Men ózim Bibisaranyń talantyna tántimin. Áli esimde, 6 jasynda bolǵanda men ony testen ótkizdim. Sol kezde onyń qabiletin kórip, anasyna birden aittym. Onyń boiynda sirek kezdesetin talant, myqty tabiǵi qabilet bar. Ol bir nársege zeiin qoiyp, uzaq otyra alady. Ony «zeiin kontsentratsiiasy» deidi. Dál osy kontsentratsiiany Bibisara uzaq ýaqyt ustap otyra alady. Negizi, ár adamnyń zeiin qoiý qabileti ártúrli. Al Bibisara test kezinde óte jaqsy nátije kórsetti. Shahmatshy úshin bul asa qajetti qabilet, óte úlken artyqshylyq», - dedi D.Sádýaqasov jýrnalisterge bergen suhbatynda.
Onyń aitýynsha, jeke qabileti arqasynda Bibisara Asaýbaev san alýan jastaǵy shahmatshylar arasynda oq boiy ozyq shyǵyp, chempion atandy.
«Men ol kezde federatsiianyń vitse-prezidenti qyzmetin atqardym. Balalar shahmatyna jaýap berdim. Biz Bibisaraǵa únemi kómektesip turdyq, jaqsy stipendiia berildi. Jattyǵýlar men jarystardyń aqshasy da tólendi. Bylaisha aitqanda, Bibisaranyń ósýi úshin barlyq jaǵdai jasaldy. Men onyń Qazaqstan federatsiiasynyń quramyna qaityp kelgenine qýanyshtymyn. Qazir ol 15 jasta. Demek, úlken jeńisterdiń bári alda», - dep atap aitty D.Sádýaqasov.
Aita keteiik, osydan úsh jyl buryn Bibisara Asaýbaeva Reseige kóship, Máskeý oblysynyń atynan óner kórsetti. Bir jyldan keiin bapker Evgenii Solojenkin oǵan elektrondy keńesterdi paidalanady dep jala japty. Alaida sotta Bibisara Asaýbaeva ózin tolyǵymen aqtap shyqty. Reseide turǵanda tanymal Garri Kasparov ony AQSh-tyń shahmat klýby atynan óner kórsetýge shaqyrdy. Biraq Bibisara ol usynystan bas tartyp, Qazaqstanǵa qaityp keldi. Shahmatshy qyz Mańǵystaý oblysynyń atynan jarystarǵa qatysatyn boldy.
