تانىمال شاحماتشى دەرمەن سەدۋاقاسوۆ رەسەيدەن قايتىپ كەلگەن بيبٸسارا اساۋباەۆانى بالا كەزٸندە ارنايى تەستتەن ٶتكٸزگەن, دەپ جازادى قازاقپارات.
«مەن ٶزٸم بيبٸسارانىڭ تالانتىنا تەنتٸمٸن. ەلٸ ەسٸمدە, 6 جاسىندا بولعاندا مەن ونى تەستەن ٶتكٸزدٸم. سول كەزدە ونىڭ قابٸلەتٸن كٶرٸپ, اناسىنا بٸردەن ايتتىم. ونىڭ بويىندا سيرەك كەزدەسەتٸن تالانت, مىقتى تابيعي قابٸلەت بار. ول بٸر نەرسەگە زەيٸن قويىپ, ۇزاق وتىرا الادى. ونى «زەيٸن كونتسەنتراتسيياسى» دەيدٸ. دەل وسى كونتسەنتراتسييانى بيبٸسارا ۇزاق ۋاقىت ۇستاپ وتىرا الادى. نەگٸزٸ, ەر ادامنىڭ زەيٸن قويۋ قابٸلەتٸ ەرتٷرلٸ. ال بيبٸسارا تەست كەزٸندە ٶتە جاقسى نەتيجە كٶرسەتتٸ. شاحماتشى ٷشٸن بۇل اسا قاجەتتٸ قابٸلەت, ٶتە ٷلكەن ارتىقشىلىق», - دەدٸ د.سەدۋاقاسوۆ جۋرناليستەرگە بەرگەن سۇحباتىندا.
ونىڭ ايتۋىنشا, جەكە قابٸلەتٸ ارقاسىندا بيبٸسارا اساۋباەۆ سان الۋان جاستاعى شاحماتشىلار اراسىندا وق بويى وزىق شىعىپ, چەمپيون اتاندى.
«مەن ول كەزدە فەدەراتسييانىڭ ۆيتسە-پرەزيدەنتٸ قىزمەتٸن اتقاردىم. بالالار شاحماتىنا جاۋاپ بەردٸم. بٸز بيبٸساراعا ٷنەمٸ كٶمەكتەسٸپ تۇردىق, جاقسى ستيپەندييا بەرٸلدٸ. جاتتىعۋلار مەن جارىستاردىڭ اقشاسى دا تٶلەندٸ. بىلايشا ايتقاندا, بيبٸسارانىڭ ٶسۋٸ ٷشٸن بارلىق جاعداي جاسالدى. مەن ونىڭ قازاقستان فەدەراتسيياسىنىڭ قۇرامىنا قايتىپ كەلگەنٸنە قۋانىشتىمىن. قازٸر ول 15 جاستا. دەمەك, ٷلكەن جەڭٸستەردٸڭ بەرٸ الدا», - دەپ اتاپ ايتتى د.سەدۋاقاسوۆ.
ايتا كەتەيٸك, وسىدان ٷش جىل بۇرىن بيبٸسارا اساۋباەۆا رەسەيگە كٶشٸپ, مەسكەۋ وبلىسىنىڭ اتىنان ٶنەر كٶرسەتتٸ. بٸر جىلدان كەيٸن باپكەر ەۆگەنيي سولوجەنكين وعان ەلەكتروندى كەڭەستەردٸ پايدالانادى دەپ جالا جاپتى. الايدا سوتتا بيبٸسارا اساۋباەۆا ٶزٸن تولىعىمەن اقتاپ شىقتى. رەسەيدە تۇرعاندا تانىمال گارري كاسپاروۆ ونى اقش-تىڭ شاحمات كلۋبى اتىنان ٶنەر كٶرسەتۋگە شاقىردى. بٸراق بيبٸسارا ول ۇسىنىستان باس تارتىپ, قازاقستانعا قايتىپ كەلدٸ. شاحماتشى قىز ماڭعىستاۋ وبلىسىنىڭ اتىنان جارىستارعا قاتىساتىن بولدى.
