Jetisaidaǵy «Kúlparshyn» ortalyq bazarynan 580 júk kóligimen 3150 tonna qoqys shyǵaryldy. Jekemenshik bazar órt qaldyqtarynan tazartyldy. Bazardy qalpyna keltirý jumystary eki aýysymda, táýlik boiy júrgizildi. Túrkistan oblysynyń ákimi Darhan Satybaldyǵa Jetisai bazarynyń búgingi jaǵdaiy baiandaldy. Oblys ákimi naqty tapsyrmalar berdi. Atalǵan oqys oqiǵa qaitalanbaýy úshin aýdan, qalalardaǵy barlyq bazarlardyń talapqa sai jumys isteýin qadaǵalap, qaýipsizdik sharalaryn tekserýdi tapsyrdy.
Órtengen bazardyń jańa jobasy jasaldy. Saýda núkteleri qolaily ári qaýipsiz etip salynady. Ony tezdetip iske qosý úshin nysan aýmaǵy 6 sektorǵa bólinip, ár sektorda Jetisaiǵa jaqyn ornalasqan Maqtaaral, Saryaǵash, Keles, Shardara, Jetisai jáne Qazyǵurt aýdandarynyń qurylysshylary jumys isteidi. Bazardyń infraqurylymy jaqsaryp, joly jóndeledi
– Halyqtyń múddesin qorǵaý – birinshi másele. Sondyqtan órtten zardap shekken kásipkerlerge kómek kórsetýdi tezdetý kerek. Jeńildetilgen nesie berýdi sheship, bankke qaryzy barlardy qoldaý qajet. Qaryzdy qaitarý merzimin shegerý boiynsha jumys kúsheitilsin, – dedi Darhan Satybaldy.
Órtengen nysan janyndaǵy jumysy toqtaǵan bazardy iske qosý boiynsha jumystar júrgizilip jatyr. Kásipkerler qalaýy boiynsha sonda kóshiriledi.
Bazarǵa órt qaýipsizdigi boiynsha mamyr aiynda tekserý júrgizilip, birneshe kemshilik anyqtalyp, eskertý jasalǵan. Órt qaýipsizdigine bailanysty talaptar saqtalmaǵan. Oqys oqiǵaǵa bailanysty politsiia tarapynan tergeý júrip jatyr. Órt-tehnikalyq saraptama, sot qurylys saraptamasy júrgizildi. Shuǵyl tergeý toby qurylǵan.
Órtten 600-den astam saýdager zardap shegip, myńnan astam saýda núktesi japa shekken. Keltirilgen shyǵyndardy óteý boiynsha arnaiy qor quryldy.
