Túrkistanda daryndy balalarǵa arnalǵan mektep-internat salynyp jatyr. Nysan ákimshilik-iskerlik ortalyqta ornalasqan. Bilim uiasynda óńirdiń barlyq aýyl-aimaǵynan jinalǵan úzdik oqýshylar men asa bilimdi balalar tálim alady. Qurylys barysymen tanysýǵa kelgen Túrkistan oblysynyń ákimi Darhan Satybaldy qaýipsizdikti saqtaýdy basty talap etti. Jumystyń sapasynyń udaiy qatań baqylaýda bolatynyn aitty. Qasbetiniń jobasymen tanysyp, jaýaptylarǵa tapsyrmalar berdi.
«Memleketti damytýdyń basty joldarynyń biri – adami kapitaldy arttyrý. Bul rette sapaly bilim beretin ordalardyń mańyzy airyqsha. Túrkistan shyn máninde rýhani ortalyqqa ainalýy úshin bilimdi, mádenietti jastar shoǵyryn tárbielegen jón. «Daryn» mektep-internatyna osyndai mindet júktelip otyr. Sondyqtan bilim oshaqtary barlyq talapqa sai salynýy kerek», – dedi D. Satybaldy.
Ótken jyly bastalǵan qurylys jumystary keler jyly aiaqtalmaq. Jumys barysynda eń sapaly degen qurylys materialdary paidalanylýda. 200-den astam qurylysshy jumyldyrylǵan. Keler jyldan bastap «Daryn» mektep-internatynda 500 oqýshy bilim alady. Bilim uiasynyń janynda 700 balaǵa arnalǵan jataqhana qurylysy qatar júrip jatyr. Ǵimarattyń jalpy aýmaǵy 30 myń sharshy metrden asady. 5 ga astam jerde ornalasqan. Nysannyń qurylys jumystary óndiristik kestege sáikes júrgizilýde. Oqý korpýsynda ishki árleý, ishki injenerlik jelilerin júrgizilip, shatyry jabylýda. Syrtqy injenerlik júieleri júrgizilgen.
Oblys ákimi Darhan Satybaldy kópqabatty turǵyn úilerdiń jáne ákimshilik ǵimaraty bar 20 qabatty eki turǵyn úi kesheniniń qurylys alańynda boldy. Ózekti máselelerdi pysyqtady. Zamanaýi keshenniń qurylysy shetel mamandarynyń atsalysýymen júzege asýda. Biznes ortalyqtary bar biik ǵimarat keler jyly paidalanýǵa berilmek. Qurylysqa 100-den astam adam tartylǵan.
