Túrkistan oblysynyń ákimi Darhan Satybaldy Saryaǵash aýdanynyń turǵyndarymen júzdesti. Maqsat – eldiń ótinishi men usynystaryn tyńdaý, ótkir máselelerdi talqylaý. Turǵyndardyń usynystaryn tyńdap, suraqtaryna jaýap bergen óńir basshysy Saryaǵash aýdanyn damytýǵa erekshe kóńil bólingenin jáne bul jumystardyń ári qarai jańa qarqynmen jalǵasatynyn jetkizdi.
Darhan Satybaldy saryaǵashtyqtarǵa óńirdiń áleýmettik-ekonomikalyq damýy men atqarylǵan jumystar jaily baiandady. Sonymen birge Memleket basshysy Qasym-Jomart Toqaevtyń qyrkúiek aiyndaǵy Qazaqstan halqyna arnaǵan Joldaýyna sáikes atqarylatyn jumystarǵa toqtaldy. Memleket basshysynyń tarapynan qoiylǵan mindetter elimizdiń ekonomikalyq ósimin jedeldetip, halyqtyń ómir súrý sapasy men ál-aýqatyn jaqsartýda mańyzdy ról atqaratynyn atap ótti. Ákimniń nátijeli eńbek etýi halqynyń qoldaýyna bailanysty ekenin aitqan oblys basshysy, halyqty birlikke, uiymshyldyqqa shaqyrdy.
«Ákimniń mindeti – halyqpen kezdesý, eldiń jaiyn bilý. Óziniń quzyreti aiasynda máselelerdi sheshý úshin sharalar qabyldaý. Barlyq jumystar kezeń - kezeńmen, mańyzdylyǵyna bailanysty júzege asady. Sondyqtan qurǵaq ýáde bere almaimyn. Kóterilgen máseleler oryndy. Sonyń ishinde halyqty jumyspen qamtamasyz etý – atqarýshy biliktiń, iaǵni bizdiń mindetimiz, Memleket basshysynyń bizge bergen tapsyrmasy. Eńbektenýdiń keleshek urpaq úshin tárbielik máni zor. Olardy eńbekke, tártipke, tazalyq pen mádenietke úiretý úshin eń aldymen ózimiz úlgi bolýymyz qajet. Saryaǵash aýdanynyń áleýmettik-ekonomikalyq damýyna erekshe kóńil bólingen. Sýy shipaly, eli eńbekqor Saryaǵashtyń bolashaǵy jarqyn. Aýdandy damytý jumystary jalǵasady», – dedi Darhan Satybaldy.
Osyǵan deiingi halyq pen ákimniń kezdesýinde kóterilgen máselelerdiń basym bóligi sheshimin tapqan. Atap aitqanda, Jibek joly aýyldyq okrýginiń Dihan baba eldi mekeninde kitaphana jáne mádeniet úiin salý maqsatynda qajetti 340,4 mln. teńge qaraldy. Qurylys jumystary bastaldy. Kókterek kentin sapaly elektr jelisimen qamtamasyz etý maqsatynda respýblikalyq biýdjetten 2022 jyly 200 mln. teńge qaraldy. Qyrkúiek aiynan bastap eskirgen elektr jelileri men baǵanalaryn jańartý jumystaryn júrgizýde.
Saryaǵash aýdanynda 7 mekteptiń qurylysy júrgizilýde. 4 mektep biyl paidalanýǵa beriledi, qalǵan 3 nysan keler jylǵa ótpeli. Aýdanda bir aýysymda 25 adam qabyldaityn 3 dárigerlik ambýlatoriia salynýda. 8 eldi mekendi aýyz sýmen qamtý jumystary júrgizilýde, jalpy quny 4 725,4 mln. teńge quraidy. Ulttyq qor esebinen 1 580,5 mln. teńge jáne oblystyq biýdjetten 2 mln.teńge baǵyttaldy.
Saryaǵash qalasynda ónimdiligi táýligine 3400 tekshe metr kárizdik tazartý qurylysynyń jumystary júrgizilýde. Nysan 2023 jylǵa ótpeli. Saryaǵash aýdanynda 6 eldi mekende elektrmen jabdyqtaý jumystary júrgizilip, biyl 1 nysan paidalanýǵa beriledi dep kútilýde. «Aýyl – El besigi» jobasy aiasynda 13 eldi mekende 30 joba iske asyrylýda. 9 mektepte kúrdeli jóndeý júrgizilip jatyr. Mádeniet úileri salynyp, joldar jóndelýde.
Búgingi kezdesýde turǵyndar tarapynan mektep salý, aýyz sý júiesin tartý, saiabaq salý, bos jer telimderin igerý, sharýalarǵa kómek kórsetý, infraqurylym jáne ózge de máseleler boiynsha suraqtaryn qoidy. Oblys ákimi eldiń árbir ótinishi men usynysyn muqiiat tyńdap, barlyq suraqqa jaýap berdi. Ótinishter hattamaǵa engizilip, jumys júrgiziletinin aitty.
Memleket basshysynyń Jarlyǵymen ákimderdiń halyqpen kezdesýleri turaqty túrde ótkiziledi. Kezdesýlerdiń ótkiziletin orny men ýaqyty resmi internet-resýrstarda, jergilikti buqaralyq aqparat quraldary men ákimdikterdiń áleýmettik jelilerindegi paraqshalarda aldyn ala jariialanady. Bul kezdesýlerdiń ereksheligi – ashyqtyq. Iaǵni, kezdesýdiń tórtten bir bóligi óńirdiń negizgi áleýmettik-ekonomikalyq kórsetkishteri týraly baiandamany tanystyrýǵa arnalsa, qalǵan bóligi «suraq-jaýap» formatynda ótkiziledi.
Túrkistan oblysynyń ákimi Darhan Satybaldy Saryaǵash aýdanyndaǵy issaparynda birqatar óndiris oryndarynda boldy. «Bes qara» qus fabrikasynda 400 myńǵa jýyq Korall-kross tuqymdy qusy ósiriledi. Táýligine 300 myń jumyrtqa shyǵarady.
Óńir basshysy Jibek joly aýyldyq okrýgindegi erte kóktemgi daqyldardyń kóshetterin daiyndaýmen ainalysatyn «Agro Tur» sharýa qojalyǵynyń da jumysymen tanysty. Kásipkerlerge qoldaý kórsetiletinin aitty. Munda jylyna 12 mln. túp kóshet ósiriledi. Kóshet egý, ósirý, kútip-baptaý, sýǵarý jumystary tolyq kompiýterlengen. Sońǵy úlgidegi avtomattandyrylǵan mundai óndiris orny elimiz boiynsha alǵash ret Saryaǵash aýdanynda ashylǵan.
