Qazaqstannyń Ýkrainadaǵy elshisi Darhan Káletaev «Jasyl dáliz» júiesine qatysty túsinik berdi, dep habarlaidy QazAqparat.
«Jasyl dáliz» júiesi boiynsha túsinik berip óteiin. Ol degenimiz shengen vizasynsyz shekaradan ótý. Júrgizilgen kelissózderden keiin bizge jasyl dálizben ótýge ruqsat berildi. Biraq, buny qazaqstandyqtar durys túsinbegen sekildi. «Jasyl dáliz» tek qana qazaqstandyqtarǵa arnalǵan keptelissiz jol degendi bildirmeidi. Áskeri jaǵdaida ondai áreketke ruqsat berilmeidi. Ýkraina aýmaǵynan ketkisi keletinder kóp, jalǵyz biz emes. Jáne shekaradan tek diplomatiialyq nómiri bar avtomashinalardy shyǵaryp jatyr. Zań solai», - dedi Darhan Káletaev.
Sondai-aq, elshi qazaqstandyqtardy avtobýspen shekaraǵa deiin jetkizý máselesine toqtaldy.
«Otandastarymyz mingen avtobýstardyń alǵashqy legi jolǵa shyqqan kezde, Lvovta bir top adam jinalyp, shuǵyl túrde Polshaǵa jetkizýimizdi surady. Qazaqstannyń Lvovtaǵy qurmetti konsýly Galina Masliýk olarǵa 3 avtobýstyń kepteliste turǵanyn aityp, kútýlerin surady. Degenmen jinalǵandar ózderi avtobýs jaldap jolǵa shyqqan. Olar qazir áli kepteliste tur, al qazaqstandyqtardy alǵashqy legin alyp ketken avtobýs qaita oralyp, ekinshi reis jasap jatyr», - deidi ol.
