9 qarasha kúni QR Qoǵamdyq damý ministri Darhan Káletaev jáne «Otandastar» qorynyń prezidenti Nurtai Ábiqaev Ystanbulda Túrkiia men Eýropa elderinde turyp jatqan qazaq diasporalarynyń jetekshilerimen kezdesti, dep habarlaidy "Ult aqparat" ministrliktiń baspasóz qyzmetine silteme jasap.
Kezdesýge Mansur Teiji, Iakýp Jan, Fazyl Toplý jáne Ábdýaqap Qara siiaqty belsendi qairatkerler keldi.
Kezdesý barysynda Darhan Káletaev Qazaqstan Prezidentiniń shetelde turyp jatqan otandastarymyzǵa airyqsha qoldaý tanytatynyn atap ótti. Atap aitqanda, Memleket basshysynyń tapsyrmasyna sáikes QR Úkimeti 2018-2022 jyldarǵa arnalǵan etnikalyq qazaqtardy qoldaý jónindegi is-sharalar josparyn bekitken bolatyn.
Atalǵan is-sharalar josparynda shet elderde etnikalyq qazaqtardyń ana tilinde bilim alýǵa jáne ony saqtaýǵa, shet elderde turatyn qazaq diasporasymen mádeni-gýmanitarlyq bailanystar ornatýǵa, sondai-aq óz elderine qaityp oralǵan qazaqtarǵa qoldaý kórsetýge baǵyttalǵan sharalar qamtylǵan.
Qandastarymyzdyń aldynda sóilegen sózinde Nurtai Ábiqaev Memleket basshysynyń bastamasymen qurylǵan qordyń maqsattary men mindetteri týraly aitty. Ol uiymnyń qyzmeti shetelde turatyn otandastarymyzǵa, sondai-aq Qazaqstanǵa kelgen etnikalyq qazaqtarǵa qoldaý kórsetýge baǵyttalǵanyn atap ótti. Bul rette, qordyń negizgi mindeti tarihi otanyna oralǵan otandastardyń beiimdelýine, sondai-aq olardyń quqyqtary men zańdy múddelerine qoldaý kórsetýde aqparattyq, uiymdastyrýshylyq jáne konsýltativtik kómek kórsetý bolyp tabylady.
Qazaq diasporasynyń ókilderi ózderiniń týǵan jerinen jyraqta bolsa da, tarihi otanymen únemi bailanysta ekendigin, Qazaqstandaǵy barlyq mańyzdy oqiǵalar men jańalyqtardan qulaǵdar ekendikterin, sondai-aq, jas urpaqtyń ana tilin, mádenietin jáne dástúrlerin úirenýde airyqsha qoldaý kórip otyrǵandaryn atap ótti.
Atalǵan kezdesý Memleket basshysynyń «Rýhani jańǵyrý» baǵdarlamalyq maqalasyndaǵy «ulttyq biregeilikti saqtaý» baǵyty aiasynda ótti.
Esterińizge sala keteiik, aǵymdaǵy jyldyń 8 qarashasynda Qazaqstan delegatsiiasy diaspora máseleleri boiynsha Túrki keńesiniń otyrysyna qatysty, onda «Túrki keńesi túrkitildes diasporalarynyń qyzmetiniń jalpy is-qimyl strategiiasyna» ózgerister engizý týraly sheshim qabyldandy jáne osy strategiiany júzege asyrý boiynsha birlesken is-qimyl jospary qabyldandy. Sondai-aq, «Otandastar» qory shetelderdegi túrki halyqtary basqarmasymen jáne olarǵa qarasty qaýymdastyqpen, Iýnýs Emre atyndaǵy qor arasynda yntymaqtastyq jáne ózara túsinistik týraly memorandýmdarǵa qol qoiyldy.
