QR Prezidenti Qasym-Jomart Toqaevtyń tapsyrmasymen Ishki ister ministrligi dári-dármekterdiń baǵasyn qymbattatý faktilerin anyqtaý boiynsha reidter ótkizdi, dep habarlaidy QazAqparat.
«Reid barysynda dári-dármekterdi jappai satyp alýdy uiymdastyrǵan adamdar anyqtaldy. Olar dári-dármektiń jasandy tapshylyǵyn týdyryp, keiin dárilerdi naqty qunynan birneshe ese artyq baǵamen qaita satqan. Dári-dármekterdi qaita satýdyń kóptegen faktileri elimizdiń barlyq óńirinde anyqtaldy. Pysyqai azamattar dári-dármekterdi fiskaldy chekterdi shyǵarmai satqan. Saldarynan adamdar dárilerdi qymbat baǵaǵa alýǵa májbúr bolǵan», - dep atap ótedi ministrlikten.
Máselen, vedomstvo málimetinshe, Nur-Sultan qalasynda politseiler qorǵanys quraldaryn zańsyz satýdyń jolyn kesti. Jergilikti turǵynnan meditsinalyq maskalar, kombinezondar, termometrler, meditsinalyq kózildirikter men antiseptikalyq quraldar tárkilendi.
Taǵy bir jaǵdaida áiel adam internet-resýrsta habarlandyrý berip, Paratsetamol, Ingavirin, Tseftriakson, Azitromitsin siiaqty asa qajetti dári-dármekterdi zańsyz satqan. Elordadaǵy saýda, oiyn-saýyq ortalyqtarynyń biriniń turaǵynda onyń avtokóliginen atalǵan dárilik preparattary bar eki qorap tabyldy.
Shymkent qalasynda Levomak meditsinalyq preparatyn 12 000 teńgege satqan jergilikti turǵyn politsiiaǵa jetkizildi. Ol dári baǵasyn óz baǵasynan 6 ese qymbatqa satqan. Dárihanada provizor bolyp jumys isteitin Shymkent qalasynyń taǵy bir turǵyny Deksametazon-Adjio preparatynyń ampýlalaryn 5 000 teńgeden bergen, negizgi baǵasy - 600 teńge.
Al Túrkistan oblysynda er adam Askorbin qyshqylyn 5 000 teńgeden satqan, onyń negizgi baǵasy - 250 teńge.
Osyǵan uqsas faktiler Almaty qalasynda, Aqmola, Aqtóbe, Atyraý, Shyǵys Qazaqstan, Jambyl, Batys Qazaqstan oblystarynda anyqtalyp otyr.
Reidtiń alǵashqy kúninde politsiia ýchaskelerine 21 adam jetkizildi.
