QR Densaýlyq saqtaý ministri Eljan Birtanov dárigerlerge ústemeaqy tóleýde anyqtalǵan zańbuzýshylyqtar týraly aityp berdi, dep habarlaidy QazAqparat.
Ministr tapsyrmasy boiynsha, dárigerlerge beriletin ústemeaqynyń durys aýdarylýy úshin óńirlerdegi barlyq komissiia quramyna Áleýmettik meditsinalyq saqtandyrý qorynyń ókilderi qosylǵan.
«Qazirdiń ózinde qor ókilderi birqatar kemshilikti anyqtady. Atap aitsaq, qaýip tobynda kórsetilmegen qyzmetkerlerge (bas dárigerler men olardyń orynbasarlary) ústemeaqy negizsiz tólengen. Ústemeaqy alýy tiis mamandar (klinikalyq jáne biohimiialyq zerthana, rentgendik diagnostika qyzmetkerleri) shet qalǵan. Qyzmetkerlerdiń qaýip toby asyryp kórsetilgen. Naýqastar tabelde kórsetilgen datadan keiin aýrýhanaǵa jatqyzylǵan. Jumys ýaqytynyń ailyq balansy kóterilip, mamanǵa beriletin ústemeaqy somasy azaiǵan. Óńirlerde tósek-oryn shamadan tys ázirlengen, arnaiy jedel járdem brigadasy anyqtalmaǵan», - dep jazdy ministr Facebook-paraqshasynda.
Sonymen birge, ministr bir aida atqarylǵan saǵattar kólemi boiynsha pikir bildirdi.
«Bas sanitarlyq dárigerdiń Qaýlysyna sáikes, aýrý aimaǵyndaǵy dárigerler jeke qorǵanys quraldaryn kiip (1-tiptegi obaǵa qarsy kostiým) 3 saǵatqa deiin jumys istei alady. Osylaisha, eńbek zańnamasynyń normalaryna súiene otyryp, zalaldy eńbek jaǵdaiynda aptasyna 36 saǵat, Bas sanitarlyq dáriger Qaýlysyna sáikes, kúnine 6 saǵat (qorǵanys kiimin kem degende eki ret aýystyrý qajet) jumys isteýge ruqsat etilgen. Jalpy, meditsina qyzmetkeriniń bir aýysymy 8-12 saǵatqa jetedi. Sebebi, olar naýqasty emdeýden bólek, qujattarmen jumys isteidi, konsýltatsiia júrgizedi, tamaq ishedi, demalady jáne taǵy basqa. Osylaisha, bir ailyq stavka jasalady», - dep túsindirdi E. Birtanov.
