Densaýlyq saqtaý ministrligi COVID-19-ben bailanysty ústemaqy alyp tastaý erte qabyldanǵan shara dep sanamai ma? Bul suraqqa QR Densaýlyq saqtaý ministri Aleksei Tsoi jaýap berdi, dep habarlaidy QazAqparat.
«Siz COVID-19-ben bailanysty ústeme tólemderdi alyp tastaý erte qabyldanǵan shara dep sanamaisyz ba? Óitkeni statsionarda em alyp jatqandardyń sany áli azaia qoiǵan joq qoi» - dep surady jýrnalist OKQ ótken baspasóz máslihatynda.
«Qosymsha tólemder týraly sheshim infektsiianyń bastapqy kezeńinde múldem túsiniksiz bolǵan kezde qabyldandy. Negizinen bul eldegi tótenshe jaǵdai jariialanǵan kezde qabyldandy. Bul kezeń byltyr ótti. Biraq buǵan qaramastan, memleket tólem merzimin uzartyp otyrdy. Bizde sol kezde jeke qorǵanys quraldary jetispedi, dári-dármekter tapshy boldy, jańa jabdyqtarmen, aýrýhanalarmen, aýany tazartý júielerimen problemalar boldy. Osynyń bárin biz saldyq. Óńirlerde jedel járdem qyzmetin jabdyqtap, dári-dármekterge qajettilikti tolyq qamtamasyz etti. Eń bastysy – biz barlyq meditsina qyzmetkerlerin vaktsinaladyq. Olardyń 99%-y vaktsinalanǵan. Iaǵni, qazir olar qorǵalǵan. Meditsina qyzmetkerleriniń qandai da bir qorǵanys múmkindigi bar. Ol kezde eshqandai múmkindik bolmady jáne vaktsina bolmady. Bul teńdesi joq qoldaý. Biraq Memleket basshysy memlekettiń múmkindikteri túpsiz emes ekenin jáne yntalandyrýdyń ózge de tásilderi qajet ekenin atap ótti», - dep túsindirdi ministr.
Ol, sondai-aq, dárigerlerdiń jalaqysy pandemiia órship turǵan kezdegidei bolmaǵanymen, qazirgi mólsheri turaqty aqtalatynyn atady.
«Agressivti jaǵdaida jumys isteitin barlyq meditsina qyzmetkerleri qosymsha aqy alady. Olardyń ailyǵy salada bizdiń áriptesterimizge qaraǵanda joǵary bolady. Belgili bir koeffitsientter bolady. Bizde qalyptasqan tásilder bar. Máselen, bolashaqta meditsina qyzmetkerleriniń jalaqysy 2,5 esege artady. Dárigerlerdiń jalaqysynyń jalpy deńgeii ortasha eseppen 500 myńǵa jetedi. Bul kezeń-kezeńimen júrgiziledi jáne jyl saiyn biz jalaqyny 30%-dan kóteremiz», - dedi Aleksei Tsoi.
Vedomstvo basshysy dárigerlerdiń jalaqysyn ýaqtyly indeksteý usynylatynyn atady.
«Iaǵni, qaýipti aimaqtarda jumys isteitin dárigerler bizde osy salada jumys isteitin dárigerlerdiń ortasha jalaqysynan joǵary bolady. Bul turaqty shara. Biz qazir bir jyl burynǵydan góri virýspen kúreske daiynbyz, jańa kadrlardy daiyndadyq», - dedi Densaýlyq saqtaý ministri.
