«Áleýmettik meditsinalyq saqtandyrý qory» KEAQ Basqarma tóraǵasy Bolat Tókejanov COVID-19 jáne virýstyq pnevmoniiamen kúreste epidemiiaǵa qarsy is-sharalarǵa tartylǵan meditsina qyzmetkerleriniń jalaqysyna qosymsha tólenetin ústemeaqy týraly aitty, dep habarlaidy QazAqparat.
Áleýmettik tólemderdi ai saiyn Áleýmettik meditsinalyq saqtandyrý qory tóleidi.
«Qordyń meditsina qyzmetkerleri aldyndaǵy barlyq mindettemelerdi tolyq jáne ýaqtyly oryndalatynyn atap ótkim keledi. Biyl naýryz-tamyz aiy aralyǵynda 73,7 mlrd teńge kóleminde ústemaqy tólendi. Qyrkúiektiń qorytyndysy boiynsha 40 myńnan astam meditsina qyzmetkeri 10,1 mlrd teńge kóleminde ústemaqy alady. Qazir óńirlik komissiialar ústemaqy alýshylardyń tizimin jasaqtaýda. Tizim daiyn bolǵannan keiin Qor ai saiynǵy qosymsha aqy tóleýge kirisedi. Bul jumysty 15 qazanǵa deiin aiaqtaýdy josparlanyp otyr», - dedi Tókejanov Ortalyq kommýnikatsiialar qyzmetinde.
Onyń sózine qaraǵanda, infektsiia taraǵan qaýipti jaǵdaida jumys istegen meditsina qyzmetkerleriniń sany epidemiologiialyq jaǵdaiǵa bailanysty ai saiyn ózgerip otyrady. Eger naýryzda koronavirýsqa qarsy jumys isteýge 19 myń meditsina qyzmetkeri tartylsa, shildede olardyń sany 79 myńǵa jetti.
Táýekel tobyna qarai meditsina qyzmetkerleri 212 myń teńgeden 850 myń teńgege deiin qosymsha aqy alady.
Aita keteiik, Memleket basshysy COVID-19-ǵa qarsy kúres aiasynda epidemiiaǵa qarsy is-sharaǵa tartylǵan densaýlyq saqtaý uiymdarynyń qyzmetkerlerine osy jyldyń ekinshi jarty jyldyǵynda yntalandyrý retinde ústemaqy tóleýge 150 mlrd teńge bólýdi tapsyrdy.
Qor jyl sońyna deiin meditsina qyzmetkerlerine ústemaqy tóleý úshin qajetti qarjynyń boljamdy esebin júrgizdi, shamamen 135 mlrd teńge qajet.
Buǵan deiin habarlanǵandai, QR DSM Taýarlar men kórsetiletin qyzmetterdiń sapasy men qaýipsizdigin baqylaý komitetiniń tóraǵasy Timýr Sultanǵaziev meditsina qyzmetkerlerine tólem jasaý máselesine qatysty túsinik berdi.
