Meditsina jáne farmatsevtika qyzmetkerleriniń kásiptik qyzmetine aralasýǵa tyiym salynatyn bolady. Bul týraly QR Parlamenti Senatynyń jalpy otyrysynda QR Densaýlyq saqtaý ministri Eljan Birtanov aitty, dep habarlaidy QazAqparat.
«Meditsina personalynyń biliktiligin arttyrý maqsatynda kadrlardyń úzdiksiz kásibi damýy, onyń ishinde jumys berýshiniń esebinen biliktiligin arttyrý; densaýlyq saqtaý qyzmetkerlerin klinikalyq, farmatsevtikalyq praktikaǵa jáne sanitariialyq-epidemiologiialyq qyzmetke jiberý úshin sertifikattaý kózdelgen. Memleket tarapynan áleýmettik qoldaýdy qamtamasyz etý úshin meditsina jáne farmatsevtika qyzmetkerlerin jergilikti biýdjet esebinen biliktilik deńgeiine sáikes qarjylai yntalandyrý men áleýmettik qoldaýǵa basym quqyqtary qarastyrylǵan», - dedi «Halyq densaýlyǵy jáne densaýlyq saqtaý júiesi týraly» kodeks pen «Keibir zańnamalyq aktilerge densaýlyq saqtaý máseleleri boiynsha túzetýler engizý jóninde» ilespe zań jobasyn tanystyrǵan ministr.
Onyń atap ótýinshe, kodekske «meditsinalyq oqys oqiǵa» uǵymy jáne ony aiqyndaý mehanizmi engiziledi. Meditsina jáne farmatsevtika qyzmetkerleriniń kásiptik qyzmetine aralasýǵa tyiym salý jáne aralasqany úshin ákimshilik jaýapkershilikti engizý usynylady. Meditsinalyq qyzmetterdi aqparatpen qamtamasyz etý maqsatynda tsifrlyq densaýlyq saqtaý máselelerin quqyqtyq retteý kózdelgen.
«Búgingi tańda, aqparattyq júielerde paidalanýshylardyń quqyqtary anyq shektelgen. Bul normalar meditsina qyzmetkerleriniń jumysyn jeńildetedi. Sonymen birge, Kodeks jobasy men basqa zańdarda jeke meditsinalyq derekterdiń sapasy, senimdiligi men qupiialyǵy úshin meditsina jáne basqa qyzmetkerlerdiń jaýapkershilikteri naqty kórsetilgen», - dedi Eljan Birtanov.
