Koronavirýsqa qarsy kúresip jatqan meditsina qyzmetkerleriniń birqataryna ústemeaqy negizsiz tólenip ketken. Bul týraly Meditsinalyq áleýmettik saqtandyrý qory (MÁSQ) basqarma tóraǵasynyń orynbasary Marat Shoranov qor janyndaǵy Qoǵamdyq keńes otyrysynda málim etti, dep habarlaidy "Ult aqparat".
Sáýir aiynda epidemiiaǵa qarsy sharalarǵa qatysyp jatqan meditsina qyzmetkerleriniń sany naýryz aiyna qaraǵanda eki jarym ese artyp, 17,7 myńnan 42,6 myń adamǵa jetken. Olarǵa aýdarylǵan ústemeaqy mólsheri de 56 paiyzǵa kóp boldy. Máselen, naýryz aiynda 3,3 mlrd teńge aýdarylsa, sáýirde 7,6 mlrd teńge jumsaldy.
«Óńirler boiynsha eseptegende epedemiiaǵa qarsy sharalarǵa meditsina qyzmetkerleri Almaty, Nur-Sultan qalalary men Túrkistan oblysynda eń kóp tartylǵan. Tiisinshe, ústemeaqy alǵandardyń kóbi de osy óńirlerde: Almaty qalasynda - 1,5 mlrd teńge, Nur-Sultan qalasynda - 1,1 mlrd teńge jáne Túrkistan oblysynda - 0,8 mlrd teńge. Ústemeaqyǵa bólinetin aqshanyń kóbeiýi – sáýir aiynda KVI boiynsha epidemiologiialyq ahýaldyń nasharlap ketýimen tikelei bailanysty. Artynsha naýryz aiyna qaraǵanda sáýir aiynda epidemiiaǵa qarsy sharalarǵa meditsina qyzmetkerleri kóbirek tartyldy», - dep habarlaidy MÁSQ baspasóz qyzmetinen.
Eske sala keterligi, Densaýlyq saqtaý ministriniń buiryǵymen epidemiiaǵa qarsy jumysqa tartylǵan meditsina qyzmetkerlerine qaýiptiliktiń úsh toby boiynsha ústemeaqy beriledi. Oǵan sáikes 212,5 myń teńgeden 850 myń teńgege deiin aqsha tólenedi. Bul maqsatqa respýblikalyq biýdjetten 35,7 mlrd teńge bólingen.
Ústemeaqy alatyn meditsina qyzmetkerleriniń tizimin jedel shtabtyń janyndaǵy aimaqtyq komissiialar túzedi. Sáýir aiynan bastap komissiialarǵa MÁSQ ókilderi de qatysa bastady. Olar aýdarylǵan qarjynyń durystyǵyn tekseredi. Osylaisha, jumys barysynda qor ókilderi ústemeaqy naýryz aiynda - 88,5 mln teńgege, sáýir aiynda 473 mln teńgege negizsiz aýdarylǵanyn anyqtaǵan.
Aimaqtar boiynsha eseptegende sáýir aiynda negizsiz tólemderdiń kóbi Almaty oblysynda (146 mln teńge), SQO-da (101 mln teńge), Nur-Sultan qalasynda (86,5 mln teńge), ShQO-da (47 mln teńge), Shymkent qalasynda (29 mln teńge) tirkelgen.
«Bul – ústemeaqy úshin beriletin tizimniń burystyǵy. Keibir óńirde tipti ákimshilik blok, kómekshi personal, kir jýatyn qyzmetkerler, kartop arshýshylar men santehnikter de kirip ketken. Dese de, tizimde naqty kimder alý kerektigi kórsetilgen», - deidi Marat Shoranov.
Epidemilogiialyq ahýalǵa bailanysty qor mamyr aiynda meditsina qyzmetkerlerine beriletin syiaqy úshin 8,6 mlrd teńge bólip, odan arǵy ailarda somany azaitýdy kózdep otyr.
