Ulttyq qaýipsizdik komiteti karantin shekteýi kezindegi QR aýmaǵyna zańsyz kirý-shyǵý arnasyn toqtatqanyn málim etti, dep habarlaidy "Ult aqparat" komitettiń saityna silteme jasap.
Komitettiń ShQO-daǵy departamenti «J» jeke meditsinalyq ortalyǵynyń Qazaqstan shekarasyn zańsyz ótýge qoldanylatyn jalǵan dárigerlik konsýltatsiialyq komissiia (DKK) qorytyndysyn satýdy toqtatqan.
«18 qyrkúiekte jalǵan DKK qorytyndysyn satyp alý arqyly atalǵan meditsinalyq ortalyq qyzmetkerleriniń zańsyz áreketi rastaldy. Búǵan deiin berilgen 200 jýyq DKK qorytyndysy, dárigerlerdiń qoly men tańbasy qoiylǵan toltyrylmaǵan blankiler, tańbalar jáne kompiýter tabylyp, tárkilendi. Kýágerlerden jaýap alý nátijesinde DKK túpnusqalary alynyp, ekspertizaǵa joldandy», delingen habarlamada.
Meditsinalyq ortalyq direktorynyń orynbasary men bas dárigeri 5 myń teńgege jalǵan DKK qorytyndysyn satqan. Olar shetel meditsinalyq mekemesinen shaqyrý qajet bolǵan jaǵdaida, qyzmet baǵasyn 10 myń teńgege baǵalaǵan.
Atalǵan is boiynsha komitettiń ShQO boiynsha departamenti Qylmystyq kodekstiń 385-baby 1-tarmaǵymen qylmystyq is qozǵady.
Tergeý sharalary jáne jinaqtalǵan dáleldeme nátijesinde kúdiktiler óz kinásin tolyǵymen moiyndady. 19 qarashada sot kúdiktilerdi Qylmystyq kodekstiń 385-baby 2-tarmaǵy boiynsha kináli dep tanyp, árqaisysyna 1 000 AEK kóleminde aiyppul taǵaiyndady.
Taǵy aita ketetin jait, sońǵy kezde Qazaqstan azamattary jáne sheteldikterdiń túrli zańsyz jolmen, jalǵan meditsinalyq anyqtamamen QR-RF shekarasyn zańsyz ótý faktileri tirkelgen.
Qyrkúiek aiynan beri úsh ShQO turǵyny jalǵan meditsinalyq anyqtamamen shekaradan zańsyz ótpek bolǵany anyqtaldy.
