Almatyda koronavirýs juqtyrǵan 2 jastaǵy qyz balanyń jaǵdaiy týraly Qoǵamdyq densaýlyqty saqtaý basqarmasynyń basshysy Tileýhan Ábildaev aitty, dep habarlaidy QazAqparat.
«Búgin taǵy 3 adamnyń juqtyrǵanyn anyqtadyq. Olardyń biri 2018 jyly týǵan búldirshin balalarǵa arnalǵan juqpaly aýrýlar aýrýhanasynda jatyr. Bala Berlin-Almaty reisimen 13 naýryzda kelgen. Bortta 12 adam bolǵan. Ekipajben qosa barlyǵy karantinge oqshaýlandy. Balanyń jaǵdaiy qanaǵattanarlyq», - dedi T.Ábildaev brifingte.
Juqpaly aýrý juqtyrǵan 2 eresek adam qazir juqpaly aýrýlar aýrýhanasyna jatqyzyldy.
«Qazir Almatyda 11 adamda koronavirýs juqpasy bar ekeni rastaldy. Olardyń barlyǵy DDSU hattamasyna sáikes, em qabyldap jatyr. Simptomatikalyq jáne virýsqa qarsy terapiia bastaldy. Bul azamattarmen bailanysta bolǵan adamdardyń barlyǵy karantinge jabyldy», - dedi ol.
Aita ketsek, Almatyda 729 adam karantinde jatyr. Taǵy 760 adam úilerinde oqshaýlanǵan.
Búginde Qazaqstanda koronavirýs juqtyrǵan adam sany 27-ge jetti. Olardyń 16-sy Nur-Sultan qalasynda bolsa, 11-i Almaty turǵyndary.
