QR DSM Qoǵamdyq densaýlyq saqtaý ulttyq ortalyǵy AQSh-taǵy epidemiiaǵa bailanysty qazaqstandyqtarǵa veipingtan bas tartýǵa shaqyrdy, dep habarlaidy "Ult aqparat".
«AQSh-ta elektrondy temekilerdi shekken adam óliminiń besinshi jaǵdaiy tirkeldi. AQSh Densaýlyq saqtaý ministrligi elektrondy temekiden paida bolatyn belgisiz aýrýǵa bailanysty adamdardy odan bas tartýǵa shaqyrýda. Búgingi tańda veipingpen bailanysty tynys alý júiesiniń problemasymen emdeýge jatqyzylǵandardyń 500-den asa oqiǵasy tirkelgen. Airyqsha taralǵan aýrý belgileri retinde jótel, keýdeniń aýyrsynýy, aýanyń jetispeýi, qaltyraý, bas aýrýy, esten tanyp qalý, diareia, anoreksiia, salmaq joǵaltý jaittary tirkelýde. Bronhoskopiia bul aýrýdyń juqpaly emes ekendigin anyqtaýǵa múmkindik berdi. Rentgenogramma ókpeniń astyńǵy bóliginiń kúńgirttengenin, kompiýterlik tomografiia — ókpe alveolary úlpildeliginiń tómendegenin kórsetti», - delingen taratylǵan málimette.
Aita keteiik, bastapqyda elektrondy temekiler men veiperler shylym shegýdi tastaýǵa nemese adamdar úshin ziiandy ádettiń zalalyn tómendetýge kómektesetin qural retinde usynylǵan. Alaida, sońǵy jyldary olar mektep oqýshylary men jastar arasynda tanymal bolyp ketti.
Veiptiń negizgi komponentteri retinde nikotin, propilenglikol - E1520 taǵamdyq qospasy, glitserin, sý jáne iistendirgishter (aromatizatorlar) qamtylǵan. Ǵalymdardyń baqylaýynsha, elektrondyq temekilerdi paidalanatyn jastar keiinnen kádimgi temekilerdi jii shege bastaidy eken.
Búgingi tańda oryn alǵan jaǵdailarǵa bailanysty búkil álemniń ǵalymdary Dúniejúzilik densaýlyq saqtaý uiymymen birlesip elektrondyq temekilerdiń adam densaýlyǵyna tigizetin zalalyn zerdeleýde.
«Osyǵan bailanysty Qoǵamdyq densaýlyq saqtaý ulttyq ortalyǵy qazaqstandyqtarǵa elektrondy temekilerden bas tartý múmkindigin qarastyrýdy usynady. Veipterdiń býyn qaýipsiz dep sanaýǵa bolmaidy. Onyń quramynda kantserogendermen birge aǵzany ýlaityn áleýetti ziiandy qosyndylar men ýytty qospalar bar, sondai-aq metall izderi nemese qyzdyrǵysh elementtiń, ne temeki qurylǵysynyń basqa bóliginiń belgileri bar. Budan basqa, devaistar jarylyp, adamdy jaraqattaýy múmkin. Ortalyq salaýatty ómir saltyn ustanýǵa: durys tamaqtaný úlesin saqtaýǵa, tuz mólsherin kóp tutynbai, sportpen ainalysýǵa, ziiandy ádetterden bas tartýǵa shaqyrady», - deidi uiym.
Eske sala keteiik, biyl qazan aiynyń basynda AQSh-ta 14 adam elektrondy temekiniń qurbany bolǵanyn habarlaǵan edik.
