Almaty dárigerleri kóshedegi dárethanadan tabylǵan sábi men onyń anasynyń jaǵdaiyn aitty, - dep habarlaidy Tengrinews.kz agenttigi.
Dárigerlerdiń aitýynsha, cábidiń 17 jastaǵy anasy 25 tamyzǵa qaraǵan túni №4 qalalyq klinikalyq aýrýhanaǵa jetkizilgen. Ginekologqa qaralǵan soń jáne zerthanalyq tekseristerden keiin oǵan "21-22 aptada aýrýhanadan tys túsik tastaý" diagnozy qoiylǵan.
"Naýqas ginekologiia bólimine jatqyzyldy. Qazir onyń jaǵdaiy ortasha aýyr. Turaqty. Gemodinamikasy turaqty. Tolyq em men tekseristen ótedi", - dedi Almaty qalasy Qoǵamdyq densaýlyq basqarmasy ókili.
Sábi balalarǵa shuǵyl meditsinalyq kómek kórsetý ortalyǵyna jetkizilgen. Ol birden jańa týǵan nárestelerge arnalǵan jansaqtaý bólimine jatqyzylǵan.
"Qazir aǵzasy salqyndaǵanyna bailanysty balanyń jaǵdaiy óte aýyr, biraq turaqty. Qurysý, qusý jáne temperatýra bolmady. Sábige 30 millilitr kóleminde balalarǵa arnalǵan tamaq berip jatyrmyz, onyń 20 millilitrin ózdiginen qabyldaidy, al qalǵanyn nazogastral tútik arqyly beremiz. Ol jansaqtaý bólimshesinde em alady", - dedi bas dáriger orynbasarynyń mindetin atqarýshy Toqtar Qurmetbek.
Eske salaiyq, oqiǵa Túrksib aýdanynda bolǵan edi. Kámeletke tolmaǵan qyz túsik tastaǵany týraly habardan keiin politsiia qyzmetkeri Nurjan Shatýnov oqiǵa ornyna baryp, ony tekserýge sheshim qabyldaǵan.
"Qyzdyń anasynan oqiǵaǵa deiin onyń kóshe dárethanasynda biraz ýaqyt bolǵanyn bildim. Ishinen qan izderin taptym. Sham jaǵyp qarasam, balany kórdim. Ol tynys alyp jatty. Osy kezde Kriminaldyq politsiia bólimshesiniń jedel ýákili politsiia leitenanty Ǵaziz Hamaskaliev bastaǵan jedel-tergeý toby keldi. Dárethana edeniniń aǵashtaryn tez arada bólshektep tastadyq. Áriptesim Ǵaziz tómen túsip, kóilegine balany orap, muqiiat shyǵaryp aldy. Sodan keiin bala jylady", - dedi quqyq qorǵaýshy.
