Búgin el Úkimetiniń otyrysynda 2020-2025 jyldarǵa arnalǵan densaýlyq saqtaýdy damytý memlekettik baǵdarlamasynyń jobasy talqylandy, – dep habarlaidy QazAqparat.
«Baǵdarlamanyń maqsaty – sapaly jáne qoljetimdi densaýlyq saqtaýdy qamtamasyz etý. Osy maqsat úsh mindet arqyly toǵyz jumys baǵyty aiasynda oryndalady. Alǵashqy mindet – qoǵamdyq densaýlyq saqtaýdy damytý. Osy oraida, tuzdy tutyný 31 paiyzǵa, temeki shegý 13,6 paiyzǵa, alkogoldi tutyný 16 paiyzǵa tómendeidi. Dene shynyqtyrý jáne sportpen ainalysatyn halyq úlesi 36 paiyzǵa jetedi. Ekinshi baǵyt aiasynda tamaq ónimderiniń sapasyna, negizgi infektsiialyq aýrýlarmen kúreske jáne jaraqattaný men jazataiym oqiǵalardy tómendetýge nazar aýdarylady», - dedi baǵdarlama jobasyn tanystyrǵan QR Densaýlyq saqtaý ministri Eljan Birtanov.
Onyń aitýynsha, nátijesinde adamnyń immýn tapshylyǵy virýsinen emdeýmen qamtý 29 paiyzǵa artady, jol-kólik oqiǵasynan ólim 24 paiyzǵa, týberkýlezben syrqattaný 9 paiyzǵa, ýlanýdan ólim 10 paiyzǵa tómendeidi. Úshinshi baǵyt aiasynda aýrýlardyń aldyn alýǵa, jastar densaýlyq ortalyqtaryn kúsheitý arqyly balalar men jastar densaýlyǵyna, onyń ishinde mentaldi jáne reprodýktivti densaýlyqqa erekshe kóńil bólinedi. Osy sharalardyń arqasynda alǵashqy meditsinalyq-sanitariialyq uiymdarǵa profilaktika maqsatymen kelý jiiligi 16 paiyzǵa artady.
«Kelesi baǵyt – Adami kapitaldy damytý. Munda kásibi damytýdy jetildirý, biomeditsinalyq zertteýler naryǵyn damytyp, kommertsiialandyrý, derbestendirilgen meditsinany engizý kózdelgen. Jalaqyny arttyrý, áleýmettik qoldaýdy kúsheitý, kásibi jaýapkershilikti qorǵaý arqyly meditsinalyq qyzmetker mártebesin arttyrý josparlanǵan. Dárigerdiń ortasha jalaqysy 2025 jyly 2,5 esege ósedi jáne aýyldaǵy meditsinalyq qyzmetkerlermen qamtamasyz etý 13 paiyzǵa artady, klinikalyq zertteýler sany 2 ese kóbeiedi», - dedi ol.
Ministrdiń atap ótinshe, besinshi baǵyt aiasynda pediatriia, ońaltý jáne basqa meditsinalyq qyzmetterdi keńeitý jáne dári-dármekpen qamtamasyz etýdi jetildiriledi. Patsientterdiń meditsinalyq kómek sapasyna qanaǵattaný 65 paiyzǵa deiin artady, múgedektikke alǵashqy shyǵý deńgeii 2,4 paiyzǵa tómendeidi. Al altynshy baǵyt aqparattyq júielerdi odan ári damytýdy, biznes intellekt quraldaryn engizýdi, qashyqtyq meditsinasyn damytýdy, statistikanyń jańa tásilderin engizýdi kózdeidi. Osylaisha, interoperabeldik platformasymen tolyq integratsiialanǵan meditsinalyq uiymdar úlesi 90 paiyzǵa jetedi.
«Densaýlyq saqtaý júiesiniń turaqty damýy» degen úshinshi mindet aiasynda halyqtyń densaýlyqqa jeke shyǵyndary 39 paiyzdan 27 paiyzǵa tómendeidi. Elbasynyń tapsyrmasyn oryndaý barysynda, alǵashqy meditsinalyq-sanitariialyq kómek pen qoǵamdyq densaýlyq saqtaýdy qarjylandyrý jalpy shyǵystardyń 60 paiyzyna jetedi. Segizinshi baǵyt aiasynda qural-jabdyqtardy jańartýǵa, iri obektilerdi salýǵa investitsiialyq shyǵyndardy óteý, tarifterdi jetildirý kózdelgen. Prezident tapsyrmasy boiynsha, meditsinalyq tehnikamen jabdyqtaý 100 paiyzǵa jetedi, meditsinalyq ǵimarattarynyń tozýy 32 paiyzǵa tómendeidi, densaýlyq salasyna investitsiialar kólemi alty jylda 2,8 trillion teńgege artady. Onyń ishinde jeke investitsiialar úlesi 70 paiyzdan asady«, - dedi ol.
Onyń dereginshe, 2025 jylǵa deiin halyqaralyq standarttarǵa sai 19 zamanaýi kópsalaly aýrýhana salynady jáne buǵan 1 trln teńgeden astam investitsiia tartý josparlanǵan. Bul iri halyqaralyq jeke investorlar arqyly oryndalady. Osylaisha, mańyzdy aýrýhana tósek oryndary 50 paiyzǵa jańarady. Bul maqsatta osy jyldyń 11 jeltoqsanynda Qazaqstan Respýblikasynyń Úkimeti men Eýropa qaita qurý jáne damý banki arasyndaǵy niet týraly memorandýmǵa qol qoiyldy.
«Toǵyzynshy baǵytqa menedjerlerdi daiyndaý jáne jobalyq basqarýdy odan ári engizý endi. Ashyqtyqty qamtamasyz etý úshin, óńirlerdiń qatysýymen densaýlyq saqtaýdyń barlyq deńgeiinde jobalyq jumys pen korporativtý basqarý kózdelgen. Nátijesinde, akkredittelgen meditsinalyq uiymdar úlesi 70 paiyzǵa, menedjment boiynsha joǵary kórsetkishteri bar meditsinalyq uiymdar úlesi 45 paiyzǵa jetedi» dedi Eljan Birtanov.
