Dárigerlerge beriletin ústemaqy jas mamandardyń yntasyn arttyryp, mamandyqqa degen mahabbatyn kúsheitedi. Bul týraly Almaty oblysy Eńbekshiqazaq aýdandyq juqpaly aýrýlar aýrýhanasynyń infektsionist dárigeri Ásem Omarova «Ult» portalyna áńgimelep berdi.
Karantin bóliminde qyzmet etip jatqan Ásem Bihasymqyzy dárigerlerge berilip jatqan ústemaqy qaýip pen qaterdiń ortasynda júrgen mamandardy jigerlendiretinin aitty. Alaida jas maman úshin mańyzdysy ústemaqy emes, elimizdegi qiyz kezeńde adal qyzmet etý.
«Qazirgi kezde kóp jerde dárigerlerge berilip jatqan ústemaqy týraly sóz bolady. Iá, ras, aqsha bizdiń ómirimizde az oryn almaidy. Qajettiligi eshqashan joiylmaidy. Degenmen bul ómirde mańyzdysy aqsha emes ekenin bárimiz túsinemiz. Árine, memleket bizdi qoldap, ústemaqy berip jatqany bizdi qýantady. Dál osy qiyn jaǵdaida dárigerlerdiń statýsy kóterildi dep oilaimyn. Eń bastysy myna kúreste biz jeńip, osy synaqtan halqymyz aman-esen, bárimiz bútin shyqsaq eken», - deidi Ásem Omarova.
Dál qazir koronvirýs infektsiiasyna qarsy kúrestiń aldyńǵy leginde júrgen meditsina salasynyń qyzmetkeri Ásem Bihasymqyzy dárigerlerge ústemaqy taǵaiyndalmaǵan kúnniń ózinde de dál osy joldy tańdaitynyn aitty.
«Men úshin ústemaqy emes, aq halatym men antym mańyzdy. Al meditsinalyq ústemaqyǵa men óz tarapymnan emes, jumys ornymnan usynylǵan. Ár dáriger sanaly túrde osy joldy tańdar edi dep oilaimyn. Bizdiń bólimde 7-8 dáriger jumys istep jatyrmyz. Al bizde karantinde jatqan adamdardy naýqas dep aita almaimyz, olar tek bailanysta bolǵan kisiler. Biraq biz úlken qaýiptiń aldyn alyp, olarmen jumys istep jatyrmyz», - deidi ol.
Almaty oblysy Eńbekshiqazaq aýdandyq juqpaly aýrýlar aýrýhanasynyń infektsionist dárigeri Ásem Omarova jas maman, jasy 27-de. Soǵan qaramastan ol barlyq kúsh-jigerin koronavirýspen kúres jolyna arnap otyr.
«Úige barmaǵanyma bir ai boldy. Ata-anamdy, baýyrlarymdy saǵynamyn, olar da meni asyǵa kútip otyr, bir jaǵynan alańdaidy. Biraq qolym qalt etse, otbasyma habarlasyp, alańdaýǵa eshqandai negiz joq ekenin aityp, sabyrǵa shaqyramyn. Buiyrsa, myna indetten aman-esen shyqsaq, otbasymyzben de, jumysymyzben de, halqymyzben de aman-esen qaýyshatyn kún keledi», - deidi dáriger Ásem Bihasymqyzy.
