Almaty qalalyq Balalar jedel meditsinalyq járdem ortalyǵynyń reanimatologiia bóliminiń meńgerýshisi, joǵary sanatty anesteziolog-reanimatolog dáriger Ulyqpan Álseiitov politsiia qyzmetkerleri ájethanadan tapqan sábidiń jaǵdaiy týraly aitty, - dep habarlaidy Tengrinews.kz agenttigi.
"Bala kóshedegi dárethanadan tabylǵannan keiin jedel járdem ony bizge ákeldi. Onyń qansha ýaqyt sol jerde jatqany belgisiz, naqty derekter joq. Bizge kelgende denesine sýyq ótken, sonymen qatar, ol enjar bolyp, uiyqtaǵysy kele beretin. Denesi kógerip ketken, dynys alýy nashar boldy. Jedel járdem brigadasy óz qyzmetin jylý tizbegin saqtap júrgizdi, birden jedel járdem kóliginde balany jylytýǵa kiristi. Bala bizdiń emhanaǵa jetkizildi. Onyń jaǵdaiy aýyr bolǵandyqtan, ony dereý jansaqtaý bólimine jatqyzdyq. Bizde jańa týǵan nárestelerge arnalǵan ashyq reanimatsiialyq ústelder bar, olar sáýleli jylý beredi jáne deneni jyldam jylytýǵa kómektesedi", - dedi reanimatolog.
Dárigerdiń aitýynsha, bala jansaqtaý bóliminde 12 kún bolǵan, osy ýaqyt ishinde barlyq qajet tekserý sharasy júrgizilgen.
"Balanyń jaǵdaiyn eskerip, sepsis pen pnevmoniianyń damýynan qoryqtyq. Sondyqtan ony aldyn alý maqsatynda antibiotika terapiiasy júrgizildi. Em qandai da bir asqynýsyz ótti. Sonymen qatar, balanyń júregin ÝZD arqyly tekseretin mamandy shaqyrdyq. Nátijesinde balanyń týa bitken júrek aqaýy bar ekeni anyqtaldy. Júrektiń kez kelgen patologiiasy aýyr aýrýlar qataryna jatady, biraq tekserý kezinde shuǵyl ota jasaý úshin derekter jetkiliksiz boldy, ádette balalar mundai diagnozben ómir súre beredi. Bala bizge túsken kezde eshqandai jaraqat belgileri baiqalmady, kindigi kesilgen, biraq ony bailanbaǵasyn azdap qan joǵaltqan", - dedi Álseiitov.
Sábi aýrýhanaǵa túsken kezde salmaǵy 2740 gramm bolsa, keiin 3070 gramm boldy.
"Qyzmet etken jyldarymda mundai jaǵdai esimde joq. Bálkim, 90-jyldary bolǵan shyǵar, biraq qazir emes. Iá, jańa týǵan nárestelerdi adamdar kóp jinalatyn, qoǵamdyq oryndarda tastap ketetin, biraq balany dárethanaǵa tastap ketkendi birinshi ret kórdim", - dedi dáriger.
Qazir qalalyq densaýlyq saqtaý basqarmasy málimetinshe, bala sábiler úiine aýystyryldy.
Eske salaiyq, biyl tamyzda Almaty politsiia qyzmetkerleri kóshedegi ájethanadan jańa týǵan náresteni taýyp alǵan edi. 17 jastaǵy qyz túsik boldy dep, sábiinen qutylǵan. Alaida tártip saqshylary sábidi ájethana shuńqyrynan taýyp, aman alyp qalǵan.
