Almatyda Pfizer vaktsinasyn alýǵa niet bildirýshiler kóp. Bul týraly №7 emhananyń bas dárigeriniń orynbasary Nurbol Jumabekov brifing barysynda aitty, dep habarlaidy QazAqparat.
Spikerdiń sózinshe, Almatyda kún saiyn 132 vaktsinatsiia pýnkti, onyń ishinde №7 qalalyq emhananyń ekpe salý bólmesi jumys isteidi.
«Biz vaktsinalaýdyń jaqsy qarqynyna jettik. Jalpy, jasóspirimderdiń, júkti áielder men bala emizetin analardyń belsendiligi qýantady. Naýqan bastalǵannan beri bizdiń emhanada 324 adam ekpe aldy, onyń ishinde 11 júkti áiel, 31 bala emizetin ana 282 jasóspirim bar. Biz «Komirnati» Pfizer preparatynyń tiimdiligi 95%-dy quraitynyn aityp otyrmyz», - dedi Nurbol Jumabekov.
Sonymen qatar, ol Almatynyń Bostandyq aýdanyna barlyǵy Pfizer óndirgen vaktsinanyń 2 016 dozasy bólingenin, qazirdiń ózinde 1 386 adam egilgenin aitty.
«Árbir egý pýnktinde qaýipsizdiktiń qatań normalary, atap aitqanda temperatýralyq rejim saqtalady. Vaktsina alǵan kezde birinshi kezekte patsientti tekserý júzege asyrylady, onyń barysynda anamnez alynady. Sondai-aq, dárigerler ótken aýrýlar týraly suraidy.Temperatýrany, qysymdy ólsheý, jutqynshaqty tekserý tikelei júrgiziledi. Sonymen qatar, dárigerler vaktsinalanǵan adamǵa nemese onyń ata-anasyna saýalnama júrgizedi. Al júkti áielderdi vaktsinatsiialaý kezinde merzimderdi belgileý qajet», - deidi dáriger.
Spiker «Komirnatidiń» bir qutysy 6 adamǵa eseptelgenin jáne alty saǵattan aspaý kerek ekenin eske saldy.
Nurbol Jumabekov vaktsinatsiiaǵa tirkeý orny arqyly aldyn ala jazylýǵa keńes berdi.
№7 emhananyń bas dárigeriniń orynbasary vaktsinalaý naýqany bastalǵannan beri vaktsinalanǵandardyń arasynda 1-2 kún ishinde inektsiia ornynda temperatýranyń shamaly kóterilýi men aýyrsynýdy qospaǵanda, eleýli janama áserler baiqalmaǵanyn aitty.
«Inektsiia salynǵan jerge úsh kún boiy sý tigizýge jáne fizikalyq belsendilik tanytýǵa, vannaǵa túsýge bolmaidy. Eger jaisyz seziný baiqalsa óz dárigerińizge nemese ekpe salǵan dárigerge habarlasqan jón», - deidi ol.
