Senat tóraǵasy bolyp qaita sailanǵan Dariǵa Nazarbaeva depýtattarǵa alǵysyn aityp, alda aýqymdy jumys kútip turǵanyn jetkizdi, dep habarlaidy Baq.kz agenttigi.
«Maǵan senim bildirip, qoldaý kórsetkenderińiz úshin úlken rahmet aitqym keledi. Bul men úshin zor mártebe jáne úlken jaýapkershilik. QR Parlamentiniń joǵarǵy palatasynyń basshysy retinde men súiikti Otanymyzdyń gúldenýi úshin bar kúsh-jigerimdi, bilimim men tájiribemdi jumsaimyn», - dedi Nazarbaeva Parlamenttiń joǵarǵy palatasynyń otyrysynda.
Senat tóraǵasy búgingi prezident joldaýynda el ómiriniń barlyq salalaryndaǵy ahýalǵa tereń taldaý jasalyp, naqty praktikalyq mindetter qoiylǵanyn aitty.
«Endi biz olardy zańdar men qaýlylar tiline kóshirýimiz kerek. Barlyq áriptesterimdi tyǵyz jumys kestesine tezirek kirisýge shaqyramyn. Qurmetti depýtattar, jumys kólemi ósip qana qoimai, olardyń sapasyna qoiylatyn talaptar da edáýir artatynyn jetkizgim keledi», - dedi Dariǵa Nazarbaeva.
Atap ótsek, búgin Dariǵa Nazarbaeva Senat tóraǵasy bolyp qaita sailanǵan edi.
