Aqparat jáne kommýnikatsiialar ministri Dáýren Abaev elimizde reseilik telearnalardyń kórsetilimine qatysty jaǵdaidy túsindirdi, dep habarlaidy Sputnik Qazaqstan tilshisi.
Búgin senattyń jalpy otyrysynda aqparat jáne kommýnikatsiialar máseleleri boiynsha keibir zańnamalyq aktilerge ózgerister men tolyqtyrýlar engizý týraly zań jobasyn talqylaý barysynda depýtat Dariǵa Nazarbaeva ministr Dáýren Abaevtan elimizde reseilik telearnalardyń kórsetilimine qatysty týyndaǵan jaǵdaidy túsindirýdi surady.
"Taiaýda reseilik arnalardyń kórsetilimin toqtatýǵa qatysty janjal boldy. Jaǵdai túsindirip berseńiz", — dedi Nazarbaeva.
"Biz reseilik áriptesterimiben qańtar-aqpanda tiisti konsýltatsiialar ótkizemiz dep kelistik. Ol ýaqytqa deiin telearnalardyń kórsetilimi toqtamaidy. Bul jerde bar gáp ekonomikalyq máselege kelip tireledi. Reseidiń keibir telearnalary Qazaqstan aýmaǵynda óz teleónimderin kórsetý úshin tarif kóterip jatyr. Keibir teleónimderge elimizde suranys joq. Máselen, "Resei-Mádeniet" telearnasy tarifterin ósirýde. Bizdiń kabeldik operatorlardyń bul telearnadan bas tartýǵa quqyǵy bar. Olar tarifin kóterip jatyr, al bizdiń operatorlar telearnanyń reitingisine qarap, ony kórsetpeý týraly sheshim qabyldai alady", — dep túsindirdi Abaev.
Ministr bul másele aldaǵy ýaqytta qarastyrylatynyn aitty.
"Eki eldiń qarym-qatynasyn eskere otyryp, konsýltatsiialar ótkizip, sodan keiin bir qorytyndyǵa kelý týraly sheshtik. Qazaqstan aýmaǵynda reseilik telearnalardy jaýyp jatyrmyz degen másele joq", — dedi Abaev.
Esterińizge sala ketsek, iD TV operatorynyń abonentterin 2017 jylǵy 11 jeltoqsannan bastap "NTV-Mir", "RTR-Planeta", "Rossiia-24", "Rossiia-Kýltýra" telearnalarynyń kórsetilimi toqtaityny týraly habarlandyrǵan bolatyn. Keiin aqparat jáne kommýnikatsiialar ministrligi bul arnalardyń transliatsiiasy 2018 jyldyń 1 naýryzyna deiin uzartylǵanyn málimdedi.
