Senat Tóraǵasy Dariǵa Nazarbaeva ekonomikany qalpyna keltirý jáne daǵdarystan keiingi damý kezeńinde qazaqstandyq biznesti qoldaý sharalary máseleleri boiynsha keńes ótkizdi. Bul týraly "Ult aqparat" Senattyń baspasóz qyzmetine silteme jasap habarlaidy.
Oǵan vitse-spikerler Bektas Beknazarov, Asqar Shákirov, Ekonomikalyq saiasat, innovatsiialyq damý jáne kásipkerlik komitetiniń tóraǵasy Serik Jaqsybekov, Qarjy jáne biýdjet komitetiniń tóraǵasy Olga Perepechina, Agrarlyq máseleler, tabiǵatty paidalaný jáne aýyldyq aýmaqtardy damytý komitetiniń tóraǵasy Áli Bektaev qatysty.
Dariǵa Nazarbaeva kirispe sózinde ekonomikany jańǵyrtý jónindegi memlekettik komissiia memleketten qoldaý kórsetiletin júie quraýshy kásiporyndardyń aldyn ala tizilimin anyqtaǵanyn atap ótti.
«Kásiporyndardyń qazirgi tiziminde qurylys pen saýda kompaniialarynyń úlesi kóbirek, al taý-ken jáne óńdeý ónerkásibi kenje qalǵan. Ekonomikalyq strategiianyń basty maqsaty - importty almastyrý saiasatyn kúsheitý bolsa da osy. Azyq-túlik qaýipsizdigi máselesi - asa mańyzdy ári biz ózimiz óndiretin azyq-túliktiń importynan nemese onsyz da ómir súre alatyn ónimderden bas tartý kerek», - dep atap ótti Dariǵa Nazarbaeva.
Senatorlar talqylaý barysynda kásiporyndardy júie quraýshy ólshem sharttaryna jatqyzatyn ólshem sharttar júiesin jańartý, tujyrymdamalar men tásilderdi qaita qaraý qajettigin, óitkeni qazirgi ólshemder qarapaiym zattar ekonomikasy strategiiasy men ekonomikalyq ahýalǵa sai kelmei otyrǵanyn atap ótti.
Jiynda sóz alǵan Tóraǵa orynbasary Bektas Beknazarov memlekettik kómek agroónerkásip keshenin qalpyna keltirýge baǵyttalýy qajet ekenin atap ótti. Ol sondai-aq 2011 jyly ólshem sharttardy qurý týraly buiryq jaryq kórgenin jáne Jeke kásipkerlik týraly zań onyń negizi bolǵanyn, ol zańnyń 2015 jyly kúshi joiylǵanyn jetkizdi.
«Bizge osy tujyrymdamalar men tásilderdi túbegeili qaita qaraý kerek. Aldymen halqymyz toq bolýy úshin azyq-túlik qaýipsizdigin qamtamasyz etý qajet. «Júie qurýshy» degen uǵymnan bas tartý kerek. Tujyrymdama basqasha bolýy tiis», - dedi B.Beknazarov.
Bul rette jergilikti atqarýshy organdarǵa osy másele boiynsha óz oilaryn ortaǵa salýǵa múmkindik berilýi kerek. Senatorlar memlekettik qoldaý ataýly ári dál bolýy, al kásiporyndardy tańdaý ólshemderi men olardy qoldaý tetikteri jalpyǵa birdei bolmai, ár salanyń ereksheligi eskerile otyryp ázirlenýi tiis ekenin atap ótti.
«Óńdeý ónerkásibine basa nazar aýdarylýy kerek. Kásiporyndar tizimi jańa kriteriilerdi eskere otyryp qaita qaralýy tiis», - dedi D.Nazarbaeva.
Memleketten kómek alýǵa úmitker kásiporyndar ózderine qandai mindettemeler alatynyn taldaý jasap, naqty anyqtaý qajet.
«Bul tizimmen eshqandai asyǵýǵa bolmaidy. Ázirge memlekettik kómek tetikteri men quraldary naqty túsinikti emes, zańnamalyq baza da daiyn emes. Qoldaýǵa talaptanatyn árbir kásiporyn resmi ólshemsharttarǵa sai kelip qana qoimai, olar jurtshylyq aldynda jumys oryndaryn saqtaýǵa jáne ulǵaitýǵa, salyqtyq túsimder, damýǵa investitsiia salý josparyna sai ishki suranys pen eksportty qanaǵattandyrýǵa mindettemeler alýy tiis. Onsyz bolmaidy, qazir ýaqyt basqa», - dep atap ótti Dariǵa Nazarbaeva.
Keńes qorytyndysy boiynsha Qazaqstan Respýblikasy Parlamenti Senaty depýtattarynyń atynan Úkimetke Júie quraýshy kásiporyndardyń tásildemeleri men ólshemderi tizilimin qalyptastyrýǵa qatysty usynystar ázirlenetin boldy.
