Memlekettik organdardyń baspasóz qyzmetteriniń jumysynda kemshilikter bar. Bul týraly búgin «Jas qalam» forýmynyń ashylýynda QR Parlamenti Senatynyń depýtaty, QR Tuńǵysh Prezidenti qorynyń direktory Dariǵa Nazarbaeva aitty, dep habarlaidy QazAqparat tilshisi.
«Árbir ministrliktiń, ákimdiktiń janynda baspasóz qyzmetti bar. Biraq, ókinishke orai kásibi daǵdylary jetkiliksiz nemese ýaqyttary jete bermeidi. Bul jumystarǵa qazir úsh dene baǵa qoiýǵa bolady, ondai problema bar. Teledidar aldynda otyrǵan qarapaiym kórermen ministr devalvatsiia, infliatsiia, naryqtaǵy qubylmalylyq, targetteý jaiynda aityp jatsa ne túsine alady? Munyń barlyǵy da sheteldik sándi ádemi sózderi», - dedi forým aiasynda BAQ ókilderine suhbat bergen senator.
Onyń aitýynsha, mundai kásibi til shaǵyn aýditoriiamen jumys istegen kezde qajet.
«Biraq, dáriger, muǵalim, zeinetker, mektep oqýshysy, stýdent bar keń aýditoriiamen basqa tilde sóilesken jón», - dedi Dariǵa Nazarbaeva.
Sonymen qatar ol Parlamentke keletin keibir sheneýnikterdiń zańdy qarapaiym tilmen túsinikti jetkize almaityndyǵyn da basa aitty.
Buǵan deiin habarlaǵanymyzdai, Dariǵa Nazarbaeva qazirgi tańda jýrnalistika kóp qyzyǵýshylyq tanytylatyn mamandyqtardyń biri ekendigin aitqan bolatyn.
Sondai-aq ol búgingi jýrnalister sheneýnikterdiń «qus tilin» jalpy buqaraǵa jetkize bilýleri kerektigin atap ótti.
Aita keteiik, qazaqstandyq jýrnalistikany damytýǵa jas jýrnalisterdiń kásibi biliktiligin arttyrýǵa baǵyttalǵan keń aýqymdy «Jas qalam» jobasyna 100-den astam jýrnalist qatysýda. Olardyń qatarynda jýrnalistermen qatar jýrnalistika fakýltetiniń stýdentteri, sondai-aq buqaralyq aqparat quraldaryna qyzyǵýshylyq tanytatyn jastar da bar.
