Senat Tóraǵasy Dariǵa Nazarbaeva Palata otyrysynda memlekettik qyzmet kórsetý máseleleri boiynsha zań jobasyn qaraý barysynda memlekettik organdardaǵy sybailas jemqorlyqtyń kóptegen derekteri týraly aityp, osy salada tártip ornatýǵa shaqyrdy.
Bul týraly Joǵary Palatanyń baspasóz qyzmeti habarlady.
Senat basshysy zań jobasyn talqylaý barysynda «Transparency International» halyqaralyq uiymynyń «Qazaqstandaǵy sybailas jemqorlyq jaǵdaiynyń monitoringi» baiandamasyndaǵy málimetterdi keltirdi, onda politsiia, memlekettik joǵary oqý oryndary, kolledjder, balabaqshalar, sot, qala qurylysyn baqylaý, jer qatynastary, halyqty jumyspen qamtý jáne áleýmettik qorǵaý basqarmalary, áskeri komissariattar, kóshi-qon qyzmeti kósh bastap turǵany aitylady. Baiandamada sonymen qatar sybailas jemqorlyq sebepteriniń alǵashqy ondyǵy arasynda mamandarda emdelý jáne qabyldaýynda bolý; jumysqa ornalasý; jer telimin alý jáne resimdeý; balany balabaqshaǵa ornalastyrý jáne taǵy basqa máseleler bar.
«Jurtshylyq ony tezirek resimdeý úshin ǵana tóleidi. Qazir biz «Tsifrlyq Qazaqstan» baǵdarlamasyn belsendi túrde júzege asyryp otyrmyz. Degenmen, baiandamada keltirilgen málimetter bizde bári jaqsy emes ekenin kórsetedi», - dep túiindedi D. Nazarbaeva.
Senat basshysy osyǵan bailanysty tsifrlyq damý, innovatsiialar jáne aeroǵarysh ónerkásibi ministriniń orynbasary Abylaihan Ospanovtan «Bul baǵytta qandai jumystar atqarylýda? Uzaqqa sozylýy jáne merzimderge bailanysty ne bolady? Barlyq bilim berý mekemelerinde aqparattandyrýdy jedeldetý úshin ne isteý kerek?» - dep surady.
Suraqqa jaýap bere kelip A.Ospanov qazirgi kezde memlekettik qyzmetterdi ońtailandyrý jáne avtomattandyrý boiynsha 500-ge jýyq jol kartasy bekitilgenin habarlady. «Bul jumystar jalǵasyn tabýda, ár eki apta saiyn bizdiń komissiianyń otyrysy bolady, barlyq eskertýler qaralady», - dedi ol.
Memlekettik qyzmetter kórsetýdegi áýre-sarsań men merziminiń saqtalmaýyna bailanysty problemalardy sheshý jóninde qandai sharalar qoldanylǵany týraly Senat Tóraǵasynyń saýalyna memlekettik qyzmet isteri agenttigi tóraǵasynyń orynbasary Marat Dáýeshov jaýap berdi. «Tájiribe kórsetip otyrǵandai, memlekettik organdar mundai qyzmetterdi kóleńkeden shyǵarýǵa múddeli emes. 2015 jyldan bastap tizilimge 170 jańa memlekettik qyzmet engizildi, onyń ishinde agenttiktiń bastamasymen 77 qyzmet usynyldy», - dedi ol.
Talqylaý qorytyndysy boiynsha Parlament Senaty memlekettik qyzmet kórsetý máseleleri boiynsha zańnamaǵa túzetýlerdi qabyldady.
