Parlament Senatynyń tóraǵasy Dariǵa Nazarbaeva koronavirýs indetimen kúreste aldyńǵy shepte júrgen azamattardyń bárine alǵys aitty, dep habarlaidy QazAqparat.
«Kez kelgen daǵdarys árqashan memlekettiń beriktigin, qoǵamnyń birligi men azamattyń adami qundylyqtaryna túsetin synaq ispetti. Senatorlardyń jáne ózimniń atymnan qiyn kezeńde judyryqtai jumylyp, birlik tanytyp otyrǵan Qazaqstan halqyna, túsinistik pen shydamdylyq tanytyp otyrǵan eldiń ár azamatyna shyn júrekten alǵys aitamyn. Men jaqyndary jáne týystarynan airylǵan otbasylardyń bárine qaiǵyryp kóńil aitamyn. Naýqastardyń tezirek jazylyp ketýin tileimin! Búgingi tańda meditsinalyq mekemelerdiń, quqyq qorǵaý organdarynyń qyzmetkerleri, áskeri qyzmetkerler jáne eriktiler shielenisken tusta jumysyn jalǵastyryp jatyr. Qazir olardyń bárine de ońai emes. Óitkeni olar aýrýhanalar men juqpaly aýrýlar bólimshelerinde, joldar men kóshelerde qorǵanysty ustap tur. Olar emdeidi, adamdardyń ómirin saqtaidy, virýstyń taralýyna jol bermei, tártip pen qaýipsizdikti qamtamasyz etedi, kúndelikti erlik kórsetedi», - dedi Dariǵa Nazarbaeva onlain rejimde ótken Senat otyrysynda.
Senat tóraǵasy osy qiyn-qystaý kúnderde olardyń bári de kópke úlgi bolyp otyrǵanyn jetkizdi.
«Meniń oiymsha búgin árbir qazaqstandyq aldyńǵy shepte turǵandarǵa aitqan alǵysyma qosylatynyna senimdimin. Máslihat depýtattaryna da erekshe alǵys bildirgim keledi. Olar óńirlerdiń áleýmettik-ekonomikalyq turaqtylyǵyn saqtaý úshin barlyq múmkindikti jasaýda. Qiyn jandarǵa qaiyrymdylyq kómek kórsetetin kásipkerlerge - olardyń jomarttyǵy, azamattyq pozitsiiasyna, qarjylyq qoldaý kórsetkenine alǵys aitamyz», - dedi ol.
