Parlament Májilisiniń jalpy otyrysynda depýtat Dariǵa Nazarbaeva jekemenshik balabaqshalar muǵalimderiniń jalaqysy máselesin kóterip, Úkimet basshysy Asqar Maminniń atyna saýal joldady, dep habarlaidy "Ult aqparat".
«Jekemenshik balabaqshalar muǵalimderiniń jalaqy deńgeiine bailanysty taǵy da Cizge júginýdemin. Aǵymdaǵy jyldyń 10 aqpanynda Qazaqstan Respýblikasy Parlamenti Májilisiniń depýtattary jekemenshik mektepke deiingi bilim berý uiymdarynda memlekettik bilim berý tapsyrysyn iske asyrý, atap aitqanda, olardy qarjylandyrýdyń jetkiliksizdigine qatysty másele kóterdi. Sizdiń depýtattyq saýalǵa bergen jaýabyńyzǵa sáikes, Qazaqstan Respýblikasynyń Úkimeti jekemenshik mektepke deiingi bilim berý uiymdaryn qoldaý úshin: salyq tóleýden bosatý, jalaqyǵa ústemaqy tóleý siiaqty tiimdi sharalar qabyldady», - dep toqtaldy D. Nazarbaeva.
Onyń sózine qaraǵanda, jergilikti biýdjet qarajatynyń jetkiliksizdigi máselesi bar oblystardyń ákimdikteri biylǵy respýblikalyq biýdjetten qosymsha qarajat bólýge biýdjettik ótinimder jiberdi. Alaida respýblikalyq biýdjetten tiisti aǵymdaǵy nysanaly transfertter bólingen joq.
«Joǵaryda aitylǵandardyń negizinde kelesi suraqtarǵa jaýap berýińizdi suraimyn, iaǵni nelikten bul qarjylandyrý 2021 jylǵa arnalǵan respýblikalyq biýdjetti naqtylaý kezinde eskerilmedi? Aǵymdaǵy qarjy jylynda Túrkistan jáne Almaty oblystaryna qosymsha qarajat bólý kózdelip otyr ma? Oblystyq, respýblikalyq mańyzy bar qalalar, astana biýdjetteriniń mektepke deiingi bilim berý uiymdaryn jan basyna normativtik qarjylandyrý úshin aǵymdaǵy nysanaly transfertterge qajettiliginiń turaqty monitoringi júzege asyrylady ma?», - dep surady depýtat.
