QR Parlamenti Senaty Halyqaralyq qatynastar, qorǵanys jáne qaýipsizdik komitetiniń tóraiymy Dariǵa Nazarbaeva ákimderge bir-bir tikushaqtan berýdi usyndy, dep habarlaidy "Ult aqparat".
«Qazaqstandyqtar áli osyndai tikushaqtardyń paidasyn bilmeitin de shyǵar. Menińshe, sanitarlyq jáne meditsinalyq aviatsiia damýy kerek. Árbir ákimde, ásirese, aýyl sharýashylyǵy mańyzdy aimaqtardyń ákimderinde bir-bir tikushaqtan bolýy tiis. 500 shaqyrymdyq qashyqtyqty kólikpen bir kúnde júrmei, tikushaqpen 2-3 saǵatta ushyp jetýge bolady», - deidi Astanadaǵy tikushaqtardy qurastyrý jáne qyzmet kórsetý zaýytyna barǵan Dariǵa Nazarbaeva.
Dariǵa Nazarbaevanyń aitýyna qaraǵanda, bul qadam sheneýnikterdiń jumysyn jeńildete túser edi.
«Sonymen birge, úlken qalalarda adamdar kóbinese tańerteń nemese keshke jaqyn kepteliste turyp qalady. Sondai úlken qalalarda mundai tikushaqtar biznes úshin jáne taksi retinde paidaly bolar edi. Menińshe, bizdiń ekonomikamyzdyń bolashaǵy buǵan múmkindik berer dep oilaimyn. Osyndai ónerkásipti árine, barlyq jaǵynan qoldaýymyz kerek. Osyǵan birtalai qarajat saldyq. Ary qarai damityn jolyn Úkimet arqyly, bálkim baǵdarlamalar arqyly qoldaý kerek», - deidi Dariǵa Nazarbaeva «Evrokopter Qazaqstan injiniring» JShS týraly.
Eske sala ketsek, búgin QR Parlamenti Senaty Halyqaralyq qatynastar, qorǵanys jáne qaýipsizdik komitetiniń tóraiymy Dariǵa Nazarbaeva bastaǵan komitet músheleri Astanadaǵy Ulttyq ǵarysh ortalyǵy men «Evrokopter Qazaqstan injiniring» JShS-da bolyp, atqarylyp jatqan jumystarmen tanysqan bolatyn.
