Mashina-traktor stansalaryn damytýdy yntalandyrý kerek. Bul jaiynda QR Parlamenti Senatynyń tóraǵasy Dariǵa Nazarbaeva «Atameken» ulttyq kásipkerler palatasy men «QazAgro» ulttyq basqarý holdinginiń basshylarymen kezdesý barysynda málim etti, dep habarlaidy "Ult aqparat".
Kezdesýge qatysýshylar óz sózderinde aýyl sharýashylyǵy tehnikalaryna qyzmet kórsetý servisi týraly máseleni kóterdi. Mysal retinde basqa elderdiń servis ortalyqtarynyń jumysy atap ótildi, olarda normativ boiynsha eń kúrdeli jóndeý jumystaryna 3 saǵat, al Qazaqstanda - 12 kúnnen 3 aiǵa deiin ýaqyt ketedi. Agroónerkásip kesheni birlestikteriniń ókilderi osyǵan bailanysty aýyl sharýashylyǵy tehnikasyna qyzmet kórsetý jónindegi kompaniialardyń jumys sharttaryn qaita qaraýdy usyndy.
Senat tóraǵasy jaýap sózinde bul máselede memlekettik qoldaý qajet ekenin atap ótti: «Servistiń qymbattyǵy óz kezeginde ónimniń ózindik qunyna áser etetin bolady. Oǵan jol berýge bolmaidy. Mashina-traktor stantsiialaryn damytýdy yntalandyrý qajet. Qazir bul oryn bos tur», - dedi ol.
Kezdesýde sóz alǵan «QazAgro» Ulttyq basqarýshy holdingi» AQ Basqarma tóraǵasy Erbol Qarashókeev qatysýshylardy kompaniianyń qarjylyq jaǵdaiymen jáne holdingtiń 2020-2029 jyldarǵa arnalǵan damý strategiiasyn tanystyrdy.
Senat depýtattary óz kezeginde taiaýdaǵy óńirlerdegi sailaýshylarmen kezdesýleri týraly aitty. Olardyń sózinshe, agrarshylar nesieleý mólshelemesiniń joǵary ekenin, shaǵyn sharýa qojalyqtaryna qol jetimdi tehnikanyń joqtyǵyn jii kóteredi. Qoldanystaǵy zańnamaǵa paidalanylmaityn aýyl sharýashylyǵy jerlerin alyp qoiýdy ońailatatyn ózgerister engizý – talqylaýdyń jeke taqyryby bolady.
Dariǵa Nazarbaeva talqylaýdy qorytyndylai kelip, agroónerkásipti damytý baǵdarlamasyn qaita qaraý kerektigine toqtaldy. Óitkeni, salada óndiristiń quldyraýy men salanyń turalaýy baiqalyp otyr, qolda bar resýrstar keibir kezde tiimdi paidalanylmaidy, kóptegen sheshimderdiń ekonomikalyq negizdelgeni kórinbeidi.
«Eger qazir barlyq óńdeýshi kásiporyndar qýatynyń 45 paiyzy ǵana paidalanylyp otyrǵan bolsa, onyń ústine 776-sin jasaýdy nesieleýdiń ne keregi bar?», - dedi ol «QazAgro» basshysyna.
Senat Tóraǵasy Dariǵa Nazarbaeva sharanyń qorytyndysy boiynsha Agrarlyq máseleler, tabiǵatty paidalaný jáne aýyldyq aýmaqtardy damytý komitetine kezdesýge qatysýshylar qozǵaǵan problemalyq máselelerdi zerdeleýdi jáne olardy parlamenttik tyńdaýlarda talqylaýǵa daiyndaýdy tapsyrdy.
Budan buryn habarlanǵandai, atalǵan kezdesý barysynda Atameken» UKP Tóralqasy Agroónerkásip komitetiniń tóraǵasy, agrofirma direktory Ivan Saýer mal sharýashylyǵyn damytýdy ne tejep otyrǵanyn aityp berdi.
