Biylǵy jyldyń 8-jeltoqsanyndaǵy derekke súiensek, Qazaqstanda dárilik zattardyń 7,4 myńnan astam ataýy tirkelgen. Onyń 77% tek qana retsept arqyly beriledi, dep habarlaidy "Ult aqparat" Dárilik zattar men meditsinalyq buiymdardy saraptaý ulttyq ortalyǵynyń málimetterine silteme jasap.
Habarlamadan málim bolǵanyndai, dári-dármekti retsept arqyly berý erejesi Densaýlyq saqtaý ministriniń arnaiy buiryǵy negizinde retteledi («Dárilik zattardy retseptimen bosatýǵa jatqyzý erejesin bekitý týraly» buiryq).
Dárilik zattyń retseptýralyq preparatqa jatatyn-jatpaityny farmatsevtikalyq jáne farmakologiialyq qasietterin saraptaý, mólsherleý, paidalaný tásilderi, qaýipsizdigi men tiimdiligine qatysty reaktsiialardy anyqtaý barysynda naqtylanady.
Qatań túrde dárigerdiń retseptisi boiynsha beriletin dári-dármekterge mikrobqa qarsy, gormondyq preparattar, quramynda esirtki jáne psihotroptyq zattary bar dáriler, adam densaýlyǵyna qaýip tóndiretin jáne qabyldaý rejimi men qoldaný tásilin saqtamaý saldarynan jaǵymsyz reaktsiialar týǵyzýy múmkin preparattar, sondai-aq inektsiia men ingaliatsiia jasaýǵa arnalǵan dárilik preparattar jatady. Sonymen qatar, tek qana aýrýhana jaǵdaiynda qoldanylatyn dári-dármekter bar. Sebebi olardy tek dárigerdiń turaqty baqylaýy negizinde ǵana qoldanýǵa ruqsat etilgen.
Dárýmender, shópten jasalǵan shailar men jiyntyqtardy alý úshin retseptiniń qajeti joq.
Retseptini emhana dárigeri jazyp beredi. Buryn ony tek qaǵaz túrinde beretin bolsa, qazir elektrondy formattaǵy retseptiler de paida boldy. Alǵashqysyna dárigerdiń qoly men móri basylýy tiis bolsa, elektrondyq retsept dárigerdiń tsifrlyq qoltańbasymen rastalýy qajet.
Qazaqstanda tirkelmegen jáne qoldanýǵa ruqsat etilmegen dárilik zattarǵa retsept jazylmaidy.
«Sońǵy kezde el arasynda dárini dárigerdiń taǵaiyndaýsyz satyp alyp, óz-ózin emdeý beleń alyp keledi. Dári-dármekti jónsiz paidalaný saldarynan keshegi COVID-19 indetiniń alǵashqy tolqyny kezinde antibiotikterge, virýsqa qarsy jáne qyzý túsiretin preparattarǵa degen suranys kúrt artty. Mundai preparattardy baqylaýsyz jáne dáriger keńesinsiz paidalaný adam densaýlyǵyna ziian. Mysaly, bizde kóptegen adamdar azdap sýyq tiip, tumaýrata qalsa birden antibiotik ishedi. Ókinishke qarai, qandai virýs juqtyrǵanyn anyqtaý úshin bakteriiaǵa analiz tapsyryp, dáriger keńesine júginetinder kemde kem. Al, virýsty antibiotikpen emdeýge bolmaidy», - deidi Dárilik zattar men meditsinalyq buiymdardy saraptaý ulttyq ortalyǵy bas direktorynyń orynbasary Baian Moldahmetova.
Eskeretin jait, nusqaýlyq boiynsha qabyldanǵan dári-dármekten keiin jaǵymsyz áseri baiqalsa nemese aýrýdy emdeýge kómektespese emdeýshi dárigerge habarlasyp Ulttyq ortalyqtyń www.ndda.kz resmi saityndaǵy sary kartany toltyrý qajet. Habarlama kartasy Ulttyq ortalyqta muqiiat taldanyp, saraptama nátijesi negizinde retteýshi organ tiisti sheshim qabyldaidy: dári-dármek seriiasy toqtatylady nemese onyń tirkeý týraly kýáligi kúshin joiady. Qazaqstanda mundai habarlamalar kóbine antibiotikterge qatysty túsedi.
Sonymen qatar, Qazaqstanda dári-dármek izdeýge arnalǵan DariKZ mobildi qosymshasy ázirlendi. Ol retseptýralyq jáne retseptisiz beriletin preparattar tizimimen tanysýǵa múmkindik beredi. Qosymshany Google Play jáne AppStore platformalary arqyly júktep alýǵa bolady. Búgingi tańda DariKZ qosymshasyn paidalanýshylar sany 136 myńǵa jýyqtady.
