Dárilik zattar baǵasyn negizsiz kóterýdiń 200-ge jýyq faktisi anyqtaldy. Bul týraly QR Sybailas jemqorlyqqa qarsy is-qimyl agenttigi Parasattylyq departamentiniń direktory Ǵanijan Asanuly aitty, dep habarlaidy QazAqparat.
«Dári-dármekterdi alypsatarlyq jaǵdailaryn joiý maqsatynda elimizdiń barlyq óńirlerinde sybailas jemqorlyqqa qarsy qyzmeti, «Adaldyq alańy» jobalyq keńseleri, arnaiy monitoringtik toptar, sondai-aq azamattyq belsendilerinen jumys toptary quryldy. Atalǵan jumys toptary áleýmettik jelilerge jáne saittarǵa tapshy dárilik zattardy satý jáne baǵany kóterý boiynsha habarlamalarǵa, aýrýhanalarda halyq úshin jasalǵan jaǵdailarǵa qoǵamdyq monitoring júrgizýde, sondai-aq dári-dármekti saqtaý jáne satý oryndaryna monitoring júrgizýde. Halyqpen keri bailanys ornatý úshin 8 702 000 2494 WhatsApp nómeri jumys isteidi. Oǵan dárilik zattardyń baǵasyn kóterý faktileri boiynsha azamattardań 4500-den astam ótinishteri kelip túsken», - dedi ol agenttiktiń baspasóz qyzmeti alańynda ótken brifing barsynda.
Onyń atap ótýinshe, jumys toptary 1555 dárihanalarǵa, 102 dári qoimalaryna, 103 aýrýhana men emhanaǵa bardy. Nátijesinde 200-ge jýyq buzýshylyq anyqtaldy.
«Negizgi buzýshylyqtardyń biri - dárilik zattardyń baǵasyn kóterý. Densaýlyq saqtaý ministrligi jylyna eki ret dárilerdiń shekti satý baǵalaryn bekitedi. Dárini shekti baǵadan asyryp satý buzýshylyq bolyp tabylady. Jaqynda jyl sońyna deiin áreket etetin dári-dármektiń jańa shekti baǵasy bekitildi. Azamattar olarmen dari.kz mobildi qosymshasynyń kómegimen tanysa alady. Kez kelgen azamat baǵany kóterý faktisin anyqtaǵan jaǵdaida, sol qosymsha arqyly shaǵym jibere alady», - dedi Ǵanijan Asanuly.
