Búgin PrimeMinister.kz resmi resýrsynyń alańynda QR Densaýlyq saqtaý ministrliginiń Farmatsiia komitetiniń tóraiymy Liýdmila Biýrabekova halyqty dári-dármekpen qamtamasyz etý salasyndaǵy jańalyqtar týraly aityp berdi. Sondai-aq, Prezident Joldaýyn iske asyrý aiasynda dári-dármekterdiń baǵalaryn tómendetý sharalary týraly sóz qozǵaldy, dep habarlaidy "Ult aqparat".
L. Biýrabekovanyń aitýynsha, «QR keibir zańnamalyq aktilerine dárilik zattar men meditsinalyq buiymdardyń ainalysy máseleleri boiynsha ózgerister men tolyqtyrýlar engizý týraly» Zań Prezidenttiń «Qazaqstannyń úshinshi jańǵyrýy: jahandyq básekege qabilettilik» Qazaqstan halqyna Joldaýyna sáikes áázirlengen jáne barlyq dári-dármekterdiń baǵasyn retteýge baǵyttalǵan.
«Zań jobasy jariialanǵannan keiin úsh ai ýaqyt ótken soń kúshine engen kezden bastap shekti kóterme jáne shekti bólshek satylym baǵalaryn anyqtaý rásimi bastalady, kóterme distribiýtorlarǵa jáne bólshek saýdada osy anyqtalǵan shekti baǵalardan asyryp dári-dármekterdi satýǵa tyiym salynady», — dedi Liýdmila Biýrabekova.
Dári-dármekterdiń baǵalaryn memlekettik retteýdi engizý óńirge qaramastan, kóterme jáne bólshek segmentte dári-dármekterdiń biryńǵai baǵasyn qalyptastyrý mehanizmin qamtamasyz etýdi kózdeidi. Sondai-aq, halyq úshin dári-dármekterdiń ekonomikalyq qoljetimdiligin arttyryp, farmatsevtikalyq naryq qatysýshylarynyń, iaǵni dári-dármekterdi óndirýshiler, kóterme jáne bólshek saýda uiymdarynyń jaýapkershiligin arttyrýǵa baǵyttalǵan.
Farmatsiia komitetiniń tóraiymy dári-dármekter baǵalaryn qalyptastyrýdaǵy josparly ózgerister baǵany retteýdiń 4 deńgeiin: óndirýshi, kóterme saýda, bólshek saýda men mindetti áleýmettik meditsinalyq saqtandyrý júiesi jáne tegin meditsinalyq kómektiń kepildik berilgen kólemi aiasyndaǵy satyp alý deńgeilerin qamtitynyn atap ótti.
«Baǵalardy retteýdiń tórt deńgeii óndirýshiniń baǵany belgileýine tikelei qatysty, degenmen olar tek Qazaqstan Respýblikasynda tirkelgen dári-dármekterge ǵana qatysty. Budan ári ústeme baǵany eskere otyryp shekti kóterme jáne shekti bólshek baǵa bekitiledi. Sonymen qatar, erejeler tegin meditsinalyq kómektiń kepildik berilgen kólemi aiasynda jáne mindetti áleýmettik meditsinalyq saqtandyrý júiesinde dárilik zattardy satyp alýǵa baǵalardy belgileýdi retteitin bolady», — dedi L. Biýrabekova.
Buǵan qosa, qymbat turatyn dári-dármekterdiń baǵalary da retteledi.
L. Biýrabekova baǵalardy retteý dári-dármekterdiń sapasyna áser etpeitinine nazar aýdardy.
«Baǵa men sapa – dári-dármekpen qamtamasyz etýde únemi eskeriletin eki kriterii. Bizde sapaǵa saraptamalyq uiym – Dári-dármekterdi saraptaýdyń ulttyq ortalyǵy jaýapty. Tirkeý júrgizilip jatqan kezde kompaniia dáriniń sapasyn rastaityn qujattar paketin usynady. Eger dári-dármek Qazaqstan Respýblikasynyń aýmaǵynda tirkelgen bolsa, onda onyń qaýipsizdigi men sapasy dáleldengen. Sáikesinshe, baǵalardy retteý dárilerdiń sapasyna eshqalai da áser etpeidi. Ózgerister shekteýlilik túrinde baiqalady, biz buiryqpen bekitetin aiyrma men ústeme baǵany jurtshylyqpen jáne qaýymdastyqtarmen belsendi túrde talqyladyq. Atalǵan baǵaǵa eshkim qarsy emes sekildi. Qandai da bir dári-dármek naryqtan shyǵyp qalmaidy dep oilaimyz», — dedi Farmatsiia komitetiniń tóraiymy.
Aita keterlik jait, elimizdiń barlyq óńirlerinde dári-dármekterdiń baǵalary birdei bolmaq.
«Dárihanalardyń aýyldyq nemese qalalyq ekenine qaramastan, baǵalar buiryqpen bekitilip, QR barlyq aýmaǵynda birdei baǵamen satylatyn bolady», — dedi L. Biýrabekova.
