© Sputnik / Irina Adamova
Túrkistanda mektepte taiaq jegen 5-synyp oqýshysy kóz jumdy. Ony aqsha taýyp bere almaǵany úshin sotqar synyptasy mekteptiń dárethanasynda uryp-soqqan deidi ájesi. Jaraqat alǵan balaqai birneshe kún aýyryp, aqyry aýrýhanada kóz jumǵan.
Balanyń jaqyndary oqýshylarǵa bas-kóz bolmaǵan mektep ujymy men der kezinde kómek bermegen dárigerlerge narazy, dep habarlady Sputnik portaly KTK arnasyna silteme jasap.
Tuńǵysh nemeresi Ramazannyń denesin birer saǵat buryn ǵana jerlegen ájesine kók sómkeni qushaqtap egilip jylaǵannan basqa qairan joq. Ótken juma kúni mektepke ketken oqýshy sabaqtan soqqy jep kelgen. Denesi aýyrsynyp, demalys kúnderi dáriniń kómegimen áreń júripti. Al dúisenbi kúni aýyryp tursa da, mektepke ketken bala úige kelisimen taǵy qulaidy. Ádette eshkimge shaǵymdanbaityn Ramazan sol kúni ájesine sotqar synyptasynan taiaq jegenin jaiyp salypty.
"Ony dárethananyń ishinde urypty. Basynan qatty soqqy alyp, qan uiyp qalǵan. Odan keiin tamyry qysylyp qalǵan dedi. Iá, búiregi de isip ketken. Ol bala "men osy synyptyń atamanymyn" dep, jýas balalardan tiyn-teben alady eken. Sonda álimjettik bolyp tur ǵoi", - deidi marqumnyń ájesi Gúlnár Mahanova.
Ramazan oqyǵan №18 mektep-gimnaziiada álimjettik kóp bolady degen áńgime ata-analar arasynda kóp aitylady eken. Biraq mektep direktory ony joqqa shyǵardy. Tipti ata-analarmen jinalys ta ótkizipti. Biraq ol otyrysta synyptaǵy sotqarlyq týraly sóz bolǵan joq deidi direktor.
"Ata-analarmen jumys júrgizdik. Soqqy jedi degen sózdi eshkim aitpady. Bizge synyp jetekshisin aýystyryp, shamaly qataldaý, talapshyl muǵalimdi qoisańyz degen usynys bildirdi. Al balamyz úshin alańdaimyz degen sóz bolǵan joq", - deidi J.Edilbaev atyndaǵy mektep-gimnaziianyń direktory Ýálihan Besimbaev.
Mekteptiń ishi-syrtyna túgel beinebaqylaý kamerasy ornatylǵan. Biraq juma kúni dárethana mańyndaǵy kamera isten shyqqan deidi direktor. Tipti taspany keri ainaldyrýdy biletin mektepte maman joq dep qutyldy. Dese de bul iske qazir politsiia aralasyp jatyr.
"Túrkistan qalasy politsiia basqarmasynyń qyzmetkerleri tekserý júrgizip jatyr. Saraptama qortyndysy boiynsha zań sheńberinde naqty sheshim qabyldanady", - dep túsindirdi Túrkistan oblysy politsiia departamentiniń baspasóz hatshysy Saltanat Qarakózova.
Qursaqta jatqanda ákesiz qalǵan Ramazandy ájesi baýyryna basyp óz ulyndai ósirgen eken. Endi nebári on jasar nemeresinen aiyrylǵan ájesi quzyrly oryndardyń barlyǵyna shaǵym túsirmek. Olar mektep dárethanasynda soqqyǵa jyǵylǵan oqýshyǵa bas-kóz bola almaǵan mektep basshylyǵyn túgel teksersin dep talap qoiady.
