II Dúniejúzilik soǵys kezinde qaisarlyǵymen tanylyp, 289 nemisti jer jastandyrǵan, ózi de sol keskilesken urysta qaza tapqan dańqty surmergen Ybyraiym Súleimenovke «Halyq qaharmany» ataǵy berilse eken. Mundai usynysty senator Muhtar Qul-Muhammed kóterip otyr, dep habarlaidy "Ult aqparat".
Jaqynda «Egemen Qazaqstan» gazetine kórnekti memleket qairatkeri, Senattyń halyqaralyq qatynastar, qorǵanys jáne qaýipsizdik komitetiniń tóraǵasy, alashshyl azamat Muhtar Qul-Muhammedtiń «Óshpes erlik» atty maqalasy jaryq kórdi.
Maqalanyń oryssha nusqasy «Kazahstanskaia pravda» gazetinde de jariialandy. Osy eńbekte II Dúniejúzilik soǵys kezinde qaisarlyǵymen tanylyp, 289 nemisti jer jastandyrǵan, ózi de sol keskilesken urysta qaza tapqan dańqty surmergen Ybyraiym Súleimenovtiń erligi baiandalady.
Ybyraiym Súleimenov - qazirgi Jambyl oblysynyń týmasy. Maqalada aitylǵandai, ol 1941 jyly áskerge shaqyrylyp, Almatydaǵy 100-atqyshtar brigadasyna kelip qosylady.
Al 1942 jyldyń tamyzynda Máskeý áskeri okrýginiń qaramaǵyna kelip, osy jyldyń qazan aiynda Kalinin maidanynyń quramynda soǵysqa aralasady.
Quralaidy kózge atqan mergen atamyz II Jahan soǵysy tarihyndaǵy úsh úlken áskeri operatsiiaǵa – «Mars» dep atalatyn Rjev, Sychevka baǵytyndaǵy shabýylǵa, Velikie Lýki qalasyn azat etý joryǵyna jáne Nevel qalasyn jaýdan bosatýǵa arnalǵan shaiqastarǵa qatysypty.
Osynyń bárinde ǵajaiyp mergendigimen kózge túsip, úsh ret qatarynan áskeri marapatqa usynylady.
Onyń erligin Uly Otan soǵysynyń dańqty qolbasshylary – Keńes Odaǵynyń Batyry, armiia generaly K.Galitskii, general-leitenant F.Lisitsyn, general-maior F.Zýev jáne general-maior A.Litvinov moiyndady.
Moiyndap qana qoiǵan joq, mergendi qatarynan birneshe ret mártebeli marapattarǵa usynyp, soǵys aiaqtalǵannan keiin jariialaǵan áskeri memýarlarynda onyń erligin zor rizashylyqpen tamsana jazady.
Tipti qazaq jaýyngeriniń dańqy sharyqtap, shyrqaý shyńyna jetkende – 1943 jyldyń 9 shildesinde Ybyraiym Súleimenov Keńes Odaǵynyń Batyry ataǵyna usynylady.
Bul qujatqa úsh birdei orys generaly K.Galitskii, A.Litvinov jáne F.Zýev qol qoiǵan.
Degenmen, túrli sebeptermen Súleimenovke deńgeii bir dárejege tómen Lenin ordeni ǵana beriledi.
Maqalada osyndai derekterdiń bári Resei Federatsiiasy Qorǵanys ministrliginiń ortalyq áskeri muraǵatynda saqtalyp turǵan naqty málimettermen dáleldi túrde keltirilgen. Qujattardyń sýretteri de qosa berilgen.
Sondai-aq, osy maqalada kezinde Altyn Juldyz buiyrmaǵan Ybyraiym Súleimenovke táýelsiz Qazaq eliniń «Halyq qaharmany» ataǵyn berý týraly másele kóterilgen.
«Shyn máninde, bul - ábden qoldaýǵa turarlyq bastama. Osy bastama nazardan tys qalmai, tiisti sheshimder qabyldansa eken degen tilegimiz bar» deidi senator.
