Sýret: Facebook.com
Rejisser Daniiar Salamat qazaq kino óneriniń qazirgi jaǵdaiyn synǵa alyp, óz pikirin bildirdi. Onyń aitýynsha, ulttyq kino óneri ideologiialyq jaǵynan jáne qarjylyq jaǵynan qiyn jaǵdaida, dep jazady Orda.kz rejisserdiń facebook paraqshasyna silteme jasap.
Daniiar Salamattyń «Kúmis qońyraý» jobasy Ulttyq kinony qoldaý ortalyǵynyń pitchinginen ótse de, Vedomstvoaralyq komissiia tarapynan qoldaý tappady. Rejisserdiń sózinshe, komissiianyń sheshimderi túsiniksiz jáne ádiletsiz boldy. Sondai-aq, qazaq kino óneri júieli reformalarǵa muqtaj ekenin ol basa aita ketti.
Ol qalyń shýdyń arasynan kinony arashalap qalý kerektigin atap ótti. Ulttyq kinoǵa usynylǵan kóptegen jobalardyń jartysy qazylar alqasynyń nazaryna ilikpei turyp, ótpei qalady. Mysaly, ol óz sózinde Timýr Bekmambetovti synap ótti. Oǵan qarjy bergenshe, aqshany talantty jastarǵa berip, qoldaý kórsetý kerektigin aita ketti.
«Timýr Bekmambetov degen kim? Oǵan nege jarty aýyz sóz aitsa, jalp etip jobasyn ótkize qoiady? Timýr qazaqtyń ulttyq rýhaniiatyna ne bermek, alǵannan basqa? Basqa «timýrshylar» ne bermek? Ol 2007 jyly «Qazaqfilmde» jalaýlatyp bastaǵan «Altyn adamynyń» aiaǵynan shyǵyp alsyn da? Basyn taýdai qylyp bastap, sońyn tyshqannyń quiryǵyndai súiirlep ketpep pe edi?
«Ózin qor sanaý kompleksi» degenimiz - osy. Bolmasa, Timýrǵa («timýrshylarǵa») ketken qarjyny tolymdy ulttyq kino jasaý úshin nege Álisher Jádigerovke («Jetimder»), nege Áribibek Óraltai («Ótúken») degen jalyndaǵan rýhty, talantty jastardyń talantty jobalaryna bermeske?», — dedi Daniiar Salamat óz jazbasynda.
Eske sala keteiik, Daniiar Salamat túsirgen «Talaq» filmi biyl Halyqaralyq Shanhai festivalinde úzdik dep tanylyp el mereiin asqaqtatqan bolatyn.
