Qazaqstandyq boksshy Daniiar Eleýsinovtiń (10-0, 6 KO) kelesi jekpe-jektegi qarsylasy aýysty, dep habarlaidy QazAqparat Sports.kz-ke silteme jasap.
Boxrec.com saitynyń málimetinshe, Eleýsinovtiń jańa opponenti argentinalyq Hýan Ernan Leal (15-1, 4 KO) bolmaq. Jekpe-jek on eki raýndqa eseptelingen, olar IBO nusqasy boiynsha jartylai orta salmaqta álem chempiony vakantty titýly úshin aiqaspaq.
Eske sala keteiik, áýelide Daniiar Eleýsinov meksikalyq boksshy Dante Hardonmen (34-7, 25 KO) judyryqtasýy kerek bolǵan. Alaida ol sparring kezinde qolyn syndyryp aldy.
Eleýsinov — Leal jekpe-jegi 18 jeltoqsan kúni Nur-Sultan qalasynda ótpek. Daniiar sońǵy ret sharshy alańǵa bir jyl buryn 2020 jylǵy qarashada shyqqan bolatyn. Onda ol Djýliýs Indongony (23-4, 12 KO) ekinshi raýndta nokaýtpen jeńdi.
