Rio-de-Janeiro Olimpiadasynyń chempiony ulttyq quramaǵa qaityp kelýi múmkin. Bul týraly boksshy QazAqparat tilshisine bergen shaǵyn suhbatynda málim etti.
- Daniiar, ótken jyldyń aiaǵynda bir jola kásipqoi boksqa aýysqanyńdy elimizdegi barlyq BAQ ókilderi jarysa jazyp, sáttilik tilegen edi. Búgin kelisim jasaǵan kompaniiańmen qol úzgeniń týraly aqparat tarady. Bul qanshalyqty ras?
- Iá, qalai estip jatsańyzdar, solai bolyp jatyr. Avstraliialyq MJA Entertainment promoýterlik kompaniiasymen kelisimshartymyz buzyldy.
- Oǵan ne sebep boldy?
- Olar bizdi aldap soqty. Al olardy kim aldaǵanyn naqtyly bilmeimin. Olar bizge bergen ýádesin oryndai almady. Negizi jospar boiynsha mamyr aiynda Qytaida birinshi jekpe-jegimizdi ótkizýimiz kerek bolǵan. Ótpei qaldy. Múmkin qytailyqtarmen kelise almaǵan shyǵar, ol jaǵy da bizge túsiniksiz. Mine, ótken jyldyń aiaǵynan beri qanshama ýaqytymyzdy aldy. Tekke ýaqytymyz ketti. Sol úshin ol promoýterlik kompaniiamen hosh aitysýǵa týra keldi.
- Endi ne istemek oiyńyz bar? Ulttyq quramaǵa qaita kelý oiyńyzda bar ma?
- Árine, ulttyq quramaǵa qaita oralý oiymda bar. Basqa joldar qarastyryp jatqan joqpyn.
- Ulttyq qurama qaitadan op-ońai ala salady dep oilaisyz ba?
-Joq, ondai ońai sharýa bolmaitynyn bilem. Ol úshin úlken súzgiden ótýime týra keledi. Qaitadan el birinshiligine qatysyp, ózimniń babymda ekenimdi dáleldeý kerekpin.
- Ulttyq quramadan ketip qalǵanyńyzǵa ókinip qalǵan siiaqtysyz?
- Aldanyp qalǵanymyzǵa ókinemiz. Ulttyq quramada menimen birge jeke bapkerim retinde ákem de jumys istedi. Áýesqoi boksqa ketem degende ákem de menimen birge jumystan shyǵyp ketti. Endi osynyń barlyǵyn qalpyna keltirý úshin biraz eńbektený kerek ekeni belgili.
- Qazir qazaqtyń menshigi atynyp ketken 69 keli salmaqta Abylaihan Júsipov degen baýyryńyz júrgenin jaqsy bilesiz? Siz ulttyq quramaǵa kelseńiz, qai salmaqta óner kórsetesiz?
- Iá, Júsipovti jaqsy bilemin. Osyǵan deiin ulttyq quramada birge jattyqtyq. Rioǵa birge bardyq. Bolashaǵynan zor úmit kúttiretin talantty boksshy. Al qazir men ulttyq quramaǵa qaita baryp jatsam, qai salmaqta judyryqtasatynymdy áli sheshken joqpyn. Ony ýaqyt kórsetedi.
