Ulttyq bank sheteldegi shottarda jatqan kapitaldy elge qaitarý joldaryn usyndy, dep habarlaidy Sputnik Qazaqstan tilshisi.
Búgin májiliste "Valiýtalyq retteý jáne valiýtalyq baqylaý týraly" QR zań jobasy qaraldy. Osy zań jobasy týraly baiandama jasaǵan ulttyq bank tóraǵasy Daniiar Aqyshevten depýtat Omarhan Óksikbaev sheteldegi shottarda jatqan milliardtaǵan dollardy elge qaitarýǵa qatysty qandai jospar jasalyp jatqanyn surady.
"Elimizde joǵalǵan valiýta kúnnen-kúnge artyp bara jatqany belgili. Sizdiń orynbasaryńyz osy parlament qabyrǵasynda elimizge qaitpaǵan aqsha 17 milliard dollardan asyp ketkenin aitqan bolatyn. Onyń 7 milliard dollary 3 jyldan 10 jylǵa deiin áli qaitpai jatyr. Jyl basynda úkimettiń keńeitilgen otyrysynda Elbasy "bizge qaýqarsyz ulttyq banktiń keregi joq" dep aitqan edi. Sizderdiń baqylaý-qadaǵalaý fýnktsiialaryńyzdy arttyrý kerektigin málimdedi. Al endi myna zań jobasynda siz taǵy qaýqarsyz baǵytty usynyp otyrsyz. Osy máseleni biz qalai durys jolǵa qoiamyz? Sheteldegi milliardtaǵan dollardy qalai elge qaitarmaqsyz?", — dep tótesinen surady depýtat.
Ulttyq bank tóraǵasy munyń shynymen de óte qiyn másele ekenin moiyndady. Aqyshev qaralyp otyrǵan zań jobasynda elge aqshany qaitarýǵa qatysty is-qimyl eki tetikpen kúsheitilgenin tilge tiek etti.
"Eldegi kapitaldy eksport-import operatsiialary arqyly syrtqa shyǵarý máselesi memlekettik organdarmen talqylandy. Zań jobasyna mynadai norma engizip otyrmyz: eger repatriatsiia (elge qaitarý – avtor eskert.) 720 kúnnen asyp ketse, biz mundai operatsiialardy kúmándi operatsiialar qataryna jatqyzamyz. Bul neni bildiredi? Qazirgi zańnama boiynsha biz mundai sipattaǵy operatsiialarǵa eshqandai shara qoldana almaimyz. Eger biz tikelei shekteý engizsek, onda obektivti sebeptermen kelisimshartyn uzartýǵa májbúr bolatyn adal kásipkerlerge qiyn bolady. Al tolyǵymen tyiym salsaq, onda Qazaqstannyń syrtqy ekonomikalyq qyzmeti edáýir nasharlap ketýi múmkin. Sondyqtan eń durysy, bul máseleni jan-jaqty zerttep, pysyqtaý qajet", — dedi ol.
Aqyshev sheteldegi kapitaldy elge qaitarýda Resei tájiribesin úlgi etti.
"Reseide tikelei shekteý joq, biraq olar Ortalyq bank, memlekettik kiris, qarjy monitoringi organdarymen óte tyǵyz jumys isteý arqyly kapitaldyń syrtqa shyǵýymen belsendi kúresip otyr. Biz de osyny júzege asyrýdy kózdep otyrmyz. Biraq qazirgi zańnama buǵan jol bermeidi. Sondyqtan usynylyp otyrǵan zań jobasynda eń birinshi, tikelei aqparat almasý qarastyrylǵan. Ekinshisi, osyndai operatsiialardy kúmándi operatsiiaǵa jatqyzý. Iaǵni, qandai da bir kúmán týsa, biz shara qoldanamyz", — dedi bank tóraǵasy.
