QR Prezidenttigine kandidat Daniia Espaeva óziniń sailaýaldy úgit naýqanyn Almatydaǵy «Aqsai-nan» naýbaihanasynan bastady, dep habarlaidy "Ult aqparat" partiianyń baspasóz qyzmetine silteme jasap.
Daniia Espaeva óziniń sailaýaldy úgit naýqanyn elimizdegi iri naýbaihanalardyń biri Almatydaǵy «Aqsai-nan» JShS bastady. Memleket tarihyndaǵy tuńǵysh áiel-úmitker jáne Respýblikandyq shtabtyń jetekshisi Azat Perýashev bastaǵan onyń jaqtaýshylary kásiporyn ujymyna sailaýaldy baǵdarlamanyń basty tustaryn aityp ótti: biznesti qoldaý, ulttyq táýelsizdik jáne jemqorlyqpen kúres.
«Kásiporyn ujymy Espaevanyń áleýmettik ónim kásipkerlerine (tamaq ónimderi, kiim-keshek, balalarǵa arnalǵan taýarlar) arnalǵan salyqty tómendetý, biznes nesieleýdiń ústemaqysyn tómendetý jáne nesie merzimin uzartý týraly baǵdarlamalyq usynystaryna rizalyǵyn bildirdi» delingen habarlamada.
Dániia Espaeva men onyń shtab músheleri kezdesý barysynda qoiylǵan suraqtarǵa jaýap berdi.
Kásiporyn jumyskerleriniń kóp bóligi áielderden turatyndyqtan kezdesýde zeinetkerlik jasqa bailanysty saýaldar qoiyldy. Sonymen qatar qalada tirkeýi joq kópbalaly otbasylardyń járdemaqy jáne baspana alý múmkinshiligi týraly sóz qozǵaldy. Kombinatta ondai analardyń sany kóp eken – olar úi jaldaǵanymen, úi qojaiyndary olardy tirkeýge alǵysy kelmeidi.
Shtab jetekshisi Azat Perýashev óz kezeginde IIM ókilderiniń tirkeýge alý máselesi boiynsha - tirkeýde joq azamattardyń jumys orny arqyly tirkeýge alyný múmkindigin qarastyratynyn málimdegenin eske túsirdi.
«Bul máseleni qarastyrýǵa ýáde beremin. Kóptegen kásiporyndardyń jumyskerleri qalada tirkelmegen aýyldyń azamattary. Olardyń sany – ujymnyń jartysy da bolýy múmkin. Eger olardy jumystan shyǵarsaq – kásiporyndardyń jumysy toqtaidy», - dedi Espaeva óz kezeginde.
