QR Prezidenttigine kandidattyń memlekettik tildi meńgerý deńgeiin anyqtaityn lingvistikalyq komissiia múshesi Seiit Qasqabasov atalmysh laýazymǵa úmitker Daniia Espaevanyń emtihan nátijesin jariialady, dep habarlaidy QazAqparat tilshisi.
Daniia Espaevanyń kandidatýrasyn «Aq jol» demokratiialyq partiiasy usynǵan bolatyn.
«Úmitker Daniia Mádiqyzy Espaeva birinshi tapsyrmada «Uly dalanyń jeti qyry» taqyrybyn tańdap aldy. Bul - jazbasha jumys. Ekinshi kezeńde Muqaǵali Maqataevtyń «Amanat» kitabyn tańdap aldy. Úshinshi tapsyrma boiynsha berilgen taqyrypqa 15 minýt sóz sóileýi kerek. Munda úmitkerge «Qoǵam jáne demokratiia» taqyryby berildi», - dedi Seiit Qasqabasov Ortalyq sailaý komissiiasynda ótken brifingte.
Lingvistikalyq komissiia úmitker jumystaryn jan-jaqty talqylap, tómendegidei qorytyndyǵa keldi.
«Úmitker emtihanǵa berilgen óz ýaqytyn tolyq paidalandy. Jazbasha jumysynda Daniia Espaeva taqyrypty jaqsy meńgergen, saýatty, tereń taldaý jasaǵan. Ekinshi tapsyrma boiynsha, ol M. Maqataevtyń eki óleńin oqydy. Qazaq tiliniń normasyna sai sózderdi anyq aityp, oiyn jetkize bildi. Úshinshi tapsyrma boiynsha «Qoǵam jáne demokratiia» taqyrybynda 15 minýt sóiledi. Ózin saiasi jaǵynan tanytyp, qoǵamnyń hal-ahýalyn jaqsy biletinin kórsetti. Bizdiń suraqtarymyzǵa jaýap berdi. Komissiia músheleri daýys bere kele, «Daniia Mádiqyzy Espaeva memlekettik tildi erkin meńgergen» degen qorytyndyǵa keldik», - dedi S. Qasqabasov.
Buǵan deiin Dáýren Abaev Daniia Espaevanyń sailaýǵa qatysýyn «Qazaqstan áielderiniń úlken jeńisi» dep baǵalaǵan bolatyn.
Eske sala ketsek, Qazaqstanda kezekten tys prezident sailaýy 2019 jyldyń 9 maýsymynda ótedi. Osy ýaqytqa deiin usynylǵan kandidatýralar: «Nur Otan» partiiasy atynan Qasym-Jomart Toqaev, «Aq jol» demokratiialyq partiiasynan - Daniia Espaeva, «Uly dala qyrandary» respýblikalyq qoǵamdyq birlestigi atynan - Sádibek Túgel, «Qazaqstan Respýblikasynyń kásipodaqtar federatsiiasy» Respýblikalyq kásipodaqtar birlestiginen - Amangeldi Taspihov, Qazaqstannyń Kommýnistik Halyq partiiasynan - Jambyl Ahmetbekov, «Aýyl» halyqtyq-demokratiialyq partiiasynan - Tóleýtai Rahymbekov jáne «Ult taǵdyry» qozǵalysy atynan - Ámirjan Qosanov.
