«Aq jol» partiiasynan Prezidenttikke úmitker Daniia Espaeva Pavlodar oblysynyń turǵyndaryn óziniń sailaýaldy baǵdarlamasymen tanystyrdy. Bul týraly «Aq jol» partiiasynyń baspasóz qyzmeti habarlady.
Aq jol» partiiasynan Prezidenttikke úmitker Daniia Espaeva búgin Ekibastuz qalasynda boldy.
Atalmysh qalada úmitkerdiń úgit toby jergilikti kásipker, energetik jáne áleýmettik saladaǵy jumyskerlermen kezdesti.
Ekibastuzda energetika, kómir ónerkásibi, baǵaly metaldardy óndirý salalary jaqsy damyǵan. Búgingi tańda qalada 8 myńdai shaǵyn jáne orta biznes obekti bar. Byltyrdyń ózinde jańadan 15 jańa obekt ashyldy.
Jergilikti biznesmendermen qatar barlyq sailaýshylardy Daniia Espaevanyń sailaýaldy baǵdarlamasy qyzyqtyrdy.
«Baǵdarlamada kásipkerlerge shaǵyn biznesti yntalandyrý úshin salyqty tómendetý, salalar úshin qosymsha qun salyǵynyń mólsherlemesin azaitý qarastyrylǵan, - dedi kásipker Viktoriia Ostrikova. – taýar baǵasynyń quny osyǵan bailanysty bolǵandyqtan, bul óte ózekti másele. Maǵan shaǵyn jáne orta biznes úshin banktegi nesie mólsherlemesin tómendetý týraly oiy unady. Bul da kókeitesti másele».
«Aq jol» partiiasynyń úmitkerimen kezdesý barysynda turǵyndar áleýmettik máselelerdi de kóterdi. Ekibastuzdaǵy halyq sany 150 myńnan asady. Munda metallýrg, injener, shahterlerdiń áýleti turady. Qala turǵyndarynyń sózinshe, sońǵy jyldary mektep bitirýshiler kórshi memleketke oqýǵa túse bastaǵan. Olar onda tehnikalyq baǵyttaǵy sapalyraq bilim alyp, jumyspen qamtylady.
«Bizdiń daryndy jastarymyz syrt jaqqa ketýde, bul máselege basa nazar aýdarý qajet, - dedi Daniia Espaeva. – Birinshiden, tehnikalyq qana emes, barlyq sala boiynsha bilim sapasyn kóterý qajet. Joǵarǵy oqý ornynan soń bitirýshiler jumys tájiribesiniń joqtyǵyna qaramastan jumyspen qamtylýy tiis».
Ekibastuzda úmitker jergilikti ónerkásip pen áleýmettik obektilerge bardy. Kezdesý barysynda Daniia Espaeva árbir qazaqstandyqtyń 9 mamyr kúngi sailaýǵa barýy kerektigin aitty.
