Shyǵys Qazaqstannyń Zyrian aýdanynda jaǵdai áli kúrdeli. Bul týraly oblys ákimi Danial Ahmetov BAQ ókilderimen ótken brifingte aitty, dep habarlaidy QazAqparat tilshisi.
Zyrian aýdanynda Buqtyrma ózeniniń tasýy saldarynan júzdegen úi biiktigi 2,3 metr sýdyń astynda qalyp otyr.
Ákimniń aitýynsha, sońǵy 3 kúnniń ishinde ózenge keptelgen muzdy jarý úshin 17 tonna qoparǵysh zat qoldanylǵan. Sinoptikter aldaǵy 3-4 kúnde kún raiy kúrt jylynyp, jaǵdai odan ári ýshyǵýy múmkin ekenin eskertipti. Al taýlarda qar áli erip úlgermegen.
«Osy jaǵdaidyń bári adam resýsrsy boiynsha da, tehnikalyq turǵydan da kóp kúsh jumsaýdy talap etedi. Ótken demalys kúnderi 811 adam qutqarylǵan bolatyn. Qazir 474 turǵyn óz úilerine qaityp kirdi. Apta sońyna qarai taǵy da tasqyn kútilýde. Jamandyq shaqyraiyq dep otyrǵan joqpyz, biraq jaǵdai óte kúrdeli bolǵandyqtan, bárine daiyn bolýymyz kerek. Qazir aýdan boiynsha myńdaǵan adamǵa ýaqytsha baspanalar daiyndalýda» - deidi Danial Ahmetov.
Aýdan boiynsha apat saldaryn joiýǵa 400-den astam adam jumyldyrylǵan. Kommýnaldyq qyzmet, tótenshe jaǵdai mamandary men áskerilerden bólek eriktiler de júr. Bykov aýylynyń jolyndaǵy kópir qazir qalpyna kelip, qatynas qaita jandanǵan. Buqtyrma, Vtorýshka, Griaznýshka, ózenderiniń arnasy bekemdelip, Al Maleev aýylynyń syrtyndaǵy 7 metrlik dambydan sý men seń qaita-qaita asyp ketýde. Munda dambany biiktetý jumystary jandanǵan.
Onyń aitýynsha, tasqynnan qatty zardap shekken 5 aýdan men 2 qalada 1371 úi sý astynda qalyp, 3400 adam kóshirilgen. Apat saldaryn joiýǵa 3492 adam juyldyrylǵan. Qazirge deiingi apat shyǵyny 3,2 mlrd teńgege dep baǵalanyp otyr. Munshama qarajat qiraǵan úilerdiń ornyna baspana satyp alý, joldar men kópirlerdi jóndeý, ózen arnalaryn bekemdeý, sý kózderin tazalaý siiaqty sharalarǵa jumsalmaq. Apattan turǵyndarǵa kelgen shyǵyn kólemin esepteýshi komissiialardyń jumysy áli jalǵasýda.
«Aldyn ala esep boiynsha barlyǵy 104 úi tolyq búlingen. Zyrian aýdanynda bul san ósýi múmkin. Munda sý alǵan 414 úidiń 135-i áli sý qursaýynda. Aýdannyń kónekózderi ózen betine 2 metr muz qatýy sońǵy 60 jylda bolmaǵan dep otyr» - deidi aimaq basshysy.
Tasqynnan qatty zardap shekken Aiagóz, Glýbokoe, Shemonaiha, Besqaraǵai, Zyrian, Katonqaraǵai aýdandary men Semei jáne Óskemen qalalary boiynsha jeke-jeke málimet bergen ákim jergilikti ákimdik qyzmetkerleri men tótenshe jaǵdai mamandarynyń jankeshtilikpen eńbektenip jatqanyn aitty. Sol sózine dálel retinde Zyrian aýdany ákiminiń orynbasary Janna Asqarovanyń basynan ótken jaǵdaidy mysalǵa keltirdi.
Al tikushaqtyń tizginin ustaǵan Danila Gýrin kúnniń bultty bolǵanyna qaramastan, jarylǵysh zattardy qajet jerge úzdiksiz jetkizip turǵan. Jýrnalisterdiń saýaldaryna jaýap bergen Danial Ahmetov tasqynnyń osyndai aýqymǵa taralýynyń sebebi muqiiat tekseriletinin aitty.
«Mysaly, Semeidegi tótenshe jaǵdaidyń bir sebebi «adam faktory» dep qazirdiń ózinde aita alamyn. Bul ispen prokýratýra ainalysyp jatyr. Ertis basseindik inspektsiiasy Shúlbi SES-nen mólsherden tys sý aǵytqan. Ony Sý resýrstary komitetiniń tóraǵasy Islam Ábishev te óńirge kelgen kezinde rastady» - dedi óńir basshysy.
