ShQO ákimi Danial Ahmetov sheneýnikterge Semei halqyn jaz ýaqytynda ystyq sýmen qamtamasyz etý úshin shara qoldanýdy tapsyrdy, dep habarlaidy "Ult aqparat" informburo.kz-ke silteme jasap.
Semei qalasynda 20 jyl boiy jaz ýaqytynda ystyq sý toqtap qalatyn.
«Semeide 1997 jyldan bastap jaz ýaqytynda ystyq sý toqtatylady. Biyl qalada ystyq sý maýsym aiyna deiin beriledi. Semei halqy bul basty problemany umytý kerek. Qarjy bar, tek jumys barysyn qadaǵalaý kerek. Semei JES-1 týrbinalar men qurylǵylardy jónge keltirý kerek. Osy jyly qalada ystyq sý bolady jáne aldaǵy ýaqytta da toqtatylmaidy. Ai saiyn Semeige kelip, ózim qadaǵalap turamyn», - dedi oblys ákimi.
Semei qalasy ákiminiń orynbasary Nikolai Ýshakov qalada ystyq sý osy ýaqytqa deiin jergilikti jylý elektr stantsiiasyn jáne aimaqtyq qazandyqty jańǵyrtýyna bailanysty bolmaǵanyn túsindirdi.
«Bul másele qalada shetel kompaniiasynyń kelýimen bastaldy. 1997 jylǵa deiin Semei qalasynda eki jylý kásiporny bolǵan. Bul «Teplokommýnenergo» jáne «Altaienergo». Keiin olar birikti. Endi qala halqyna ystyq sý jóndeý jumystary aiaqtalǵan soń beriledi. 2009 jyldan bastap JES-1 –de rekonstrýktsiialaý men modernizatsiialaý jumystary júrse, 2012 jyldan bastap aimaqtyq qazandyqtar qolǵa alyndy», - dedi Ýshakov.
Qala turǵyndary bolsa, jaz ýaqytynda sý ysytqysh quraldaryn paidalanyp kelgen. Árine bul turǵyndardyń qaltasyna úlken salmaq salyp otyrǵan.
«Osy ýaqytqa deiin qalada ystyq sý bolmady, barlyǵymyz sý ysytqysh quraldaryn satyp alyp, ornatyp qoidyq. Jylý maýsymy bastalǵanǵa deiin solai kúneltetinbiz. Bul úshin elektr energiiasy úshin qomaqty qarjy tóleitinbiz», - deidi qala turǵyny Qarlyǵash Ospanova.
