Shyǵys Qazaqstan oblysynyń ákimi Danial Ahmetov karantindik shekteýler jeńildetilgenimen, saqtyq sharalaryn umytpaý qajettigin eskertti, dep habarlaidy "Ult aqparat".
«Jarty ai boiy bizdiń oblys karantindik is-sharalardyń «sary aimaǵynda» keledi. Sońǵy on bes kúnde tósek qorynyń qamtylý paiyzy 14,5-ten 11,3% deiin tómendedi. Óńirimizdiń árbir turǵynynyń azamattyq jaýapkershiligi jáne kásipkerlerdiń sanitarlyq talaptardy saqtaýdaǵy kúsh-jigeri oblys aýmaǵynda turaqty jaǵdaidyń saqtalýyna zor úmit beredi», - dep jazdy Danial Ahmetov Facebook-paraqshasynda.
Onyń aitýynsha, búginde ShQO-da shaǵyn jáne orta biznes ádettegi jumys qalpyna qaita kóshýde. Aldaǵy mereke kúnderi kásipkerlerdiń shtattyq rejimde jumys isteýine de múmkindik berilip otyr.
«Osylaisha, oblys aýmaǵynda ornalasqan azyq-túlik jáne azyq-túlik emes taýarlardyń saýda obektilerine, iaǵni bazarlarǵa, sondai-aq sýper jáne gipermarketterge, saýda úilerine, saýda-oiyn ortalyqtaryna mereke kúnderi (16-19 jeltoqsan aralyǵynda) jumys isteýge ruqsat berildi. Árine, barlyq sanitarlyq talaptar saqtalýy tiis. Demalystan (jeksenbiden) basqa kúnderi sport nysandary, muz aidyndary, monshalar, basseinder men SPA-ortalyqtary aldyn ala jazylý boiynsha jumys isteidi. Sondai-aq balalardy ońaltý jáne bilim berý ortalyqtary, mádeniet obektileri, kitaphanalar, murajailar, biznes-ortalyqtar jáne sulýlyq salondary ShQO Bas sanitary mindetin atqarýshynyń qaýlysynda belgilengen shekteýlerge sáikes qyzmetin júzege asyrady», - dedi aimaq basshysy.
Danial Ahmetovtyń sózinshe, dárigerler kóp adam jinalýy yqtimal kez kelgen sharadan bas tartýdy usynýda. Sondyqtan qoǵamdyq tamaqtaný oryndarynda jappai, otbasylyq, ujymdyq merekeler ótkizýge ruqsat joq.
«Sondai-aq balalar oiyn alańdary men attraktsiondardyń qyzmetine tyiym salyndy. Barlyq kásiporyndar árbir qyzmet salasy úshin belgilengen sanitarlyq-epidemiologiialyq talaptardy qatań saqtaýy tiis. Bizdiń basty mindetimiz – karantindik shekteýler jeńildetilgenmen saqtyq sharalaryn umytpai, indettiń qaita órshýine jol bermeý», - dedi oblys ákimi.
