Shyǵys Qazaqstan oblysynyń ákimi Danial Ahmetov Berel jazyǵynda professor Zeinolla Samashev bastaǵan ǵalymdar zertteý jumystaryn júrgizip jatqan №5 qorǵanǵa keldi, dep habarlaidy QazAqparat tilshisi.
Zeinolla Samashev jaqynda ǵana №5 eski qorǵannan III ǵasyrdyń basy - IV ǵasyrdyń aiaǵynda ómir súrgen bolýy yqtimal aqsúiek áieldiń tony, belbeýi jáne ábzelderimen birge eki attyń qaldyqtary tabylǵandyǵyn aitty.
Ákim Zeinolla Samashevpen birge 7 metrlik qorǵanǵa túsip, onda tabylǵan ejelgi jádigerlermen jan-jaqty tanysty.
«Jerlengen áiel qabirinde qanjar tabyldy. Bul áieldiń jaýynger bolǵanyn dáleldeidi. Ejelde áielder erlerimen birge jaýǵa shapqan. Olar jaýynger, dala amazonkalary bolǵan. Oǵan mysaldar jeterlik. Uzaqqa barmai-aq tarihta óziniń orny bar, osy aýmaqta mekendegen Tumar hanshaiymdy alýǵa bolady. Bir-birine jaqyn jatqan qorǵandarda jaýynger áielderdiń jerlenýi kezdeisoqtyq emes. Altyn ǵasyrda ómir súrgen áielder erlerimen teń quqyly bolyp, mańyzdy sheshimderde olardyń daýysy esepke alynǵan», - dedi Danial Ahmetov.
Ótken jyly Berel jazyǵyndaǵy № 2 qorǵannan óz zamanynda óte yqpaldy tulǵa bolǵan adamnyń múrdesi men altynmen aptalǵan 7 at tabylǵan bolatyn.
Aita keteiik, Berelde saq patshalarynyń 100-den astam qorǵany shoǵyrlanǵan. 1998 jyldan bastap bul jerde arheologiialyq qazba jumystary júrgizilip keledi. Nátijesinde keshegi tasqa qalaǵan tarih búgingi ulttyq tarihymyzǵa mol mura bolyp qosylyp jatyr.
