Tsifrlyq damý, innovatsiialar jáne aeroǵarysh ónerkásibi ministrliginiń mamandary Ashyq jobasyna qatysýshy nysandardyń qalai tekseriletindigin túsindirdi, dep habarlaidy QazAqparat.
Tsifrlyq damý, innovatsiialar jáne aeroǵarysh ónerkásibi ministrliginiń tsifrlyq sheshimder departamentiniń direktory Bekbolat Moldabekovtiń aitýynsha, meiramhana men dámhanalarda sanitarlyq dárigerdiń qaýlysymen ujymdyq kezdesýlerge tyiym salynǵan. Osy talaptyń saqtalýyn ákimdikter janyndaǵy monitoringtik toptar qadaǵalaýy kerek.
«Osy toptar Ashyq jobasyna qatysýshy nysan talapty buzǵanyn anyqtasa, Tsifrlyq damý, innovatsiialar jáne aeroǵarysh ónerkásibi ministrligine habar beredi. Ministrlik ol nysandy alǵashqy joly eki aptaǵa qosymshadan shyǵaryp, QR tańbasyn júieden aiyrady. Osy kemshilik ekinshi ret qaitalansa eki aiǵa júieden shyǵarylady», - dedi ministrlik ókili.
Algoritm boiynsha montoring toptary dámhanalardyń talapty qanshalyqty saqtap jatqanyn 5 suraq boiynsha tekserýi kerek.
«Birinshiden, nysan ishindegi adamdardyń bári maska taǵýǵa mindetteledi. Ekinshiden, jumys isteý ýaqytyn buzbaýy kerek. Úshinshiden, bir ústelge 5-6 adamnan kóp otyrýǵa bolmaidy. Tórtinshiden, nysan ishinde 30 paiyzdan artyq júktelim bolmaýy tiis nemese adam sany 50-den aspaýy qajet. Osy shekteýlerdi buzsa, ákimdik arqyly málimetti bizge anyqtama jiberedi», - dedi Bekbolat Moldabekov.
Vedomstvo ókili Ashyq jobasyna qatysýshylar arasynda jumysy kúdikti nysandar bar ekenin atap ótti.
«Qazir Ashyq jobasyna qatysýshy meiramhanalar men dámhanalardy baqylap jatyrmyz. Keibirinde QR tańbany skanerleý óte az. Ózi úlken nysan bola tura kúnine 3-4 adam ǵana skanerden ótken. Iaǵni ol durys jumys istemei tur nemese kelýshilerdi skanerlemei-aq kirgizip otyr degen sóz. Ondai nysandarǵa jeke monitoring toptaryn jiberip jatyrmyz», - dedi departament direktory.
