Ulttyq ekonomika ministri R. Dálenov QR Úkimetinde ótken brifingte Memleket qyzmetiniń turaqtylyǵyn qamtamasyz etý sharalary týraly Prezident Jarlyǵyna qatysty túsinikteme berdi, dep habarlaidy "Ult aqparat" primeminister.kz saityna silteme jasap.
Jarlyqqa sáikes QR Úkimetine salyq tóleýshilerdiń sanattaryn, salyq mólsherlemelerin jáne salyq salý tártibin anyqtaý tapsyryldy. R. Dálenov atap ótkendei, Ulttyq ekonomika ministrligi usynystar ázirledi.
«Iri saýda nysandaryn, kinoteatrlardy, teatrlardy, kórmelerdi, sport nysandaryn qoldaý úshin salyqtyq yntalandyrý berý usynylady. Bul – zańdy tulǵalar men jeke kásipkerlerdi múlik salyǵynan bir jylǵa bosatý, bir toqsan ishinde salyq bereshegi boiynsha ósimpuldy esepteýdi toqtata turý jáne salyq eseptiligi men esep aiyrysýlardy berý merzimin úshinshi toqsanǵa aýystyrý», — dedi ministr.
Usynylyp otyrǵan sharalardy Memleket basshysymen keliskennen keiin Úkimet jaqyn arada qabyldaityn bolady.
Sonymen qatar R. Dálenov tabystyń joqtyǵyna bailanysty iri meiramhanalar men basqa da ýaqytsha jabylǵan nysandardyń aqsha shyǵynynyń aldyn alý, jalǵa alý aqysyn tóleý, qyzmetkerlerdiń jalaqysyn berý máselesin qalai eńserýge bolatynyn túsindirdi. Onyń aitýynsha, bul máseleniń birneshe sheshimi bar.
«Birinshiden, eger jalaqy eseptelmese, onda jalaqydan tabys salyǵy ustalmaidy. Bul qoldanystaǵy norma. Ekinshiden, eger jalaqy eseptelse, biraq kassalyq alshaqtyqqa bailanysty salyq mindettemelerin oryndaýǵa múmkindik bolmasa, salyq bereshegine ósimpuldy eseptemeýdi engizý usynylady. Bul ýaqytsha norma. Úshinshiden, osy jyly jalpy belgilengen rejimde jumys isteitin jeke kásipkerlerdi tabys salyǵynan bosatý usynylady. Bul qarajatty únemdeýge jáne olardy jalaqy tóleýge jumsaýǵa múmkindik beredi», — dedi R. Dálenov.
Sonymen qatar, onyń aitýynsha, ShOB-tiń jekelegen sanattaryna arnalǵan salyqtyq yntalandyrýlar da úi-jai ieleriniń jaldaý mólsherlemesin tómendetýine múmkindik beredi.
