Búgin Ulttyq ekonomika ministri Rýslan Dálenov Aqmola oblysyna jumys sapary aiasynda jergilikti kásipkerlermen kezdesip, biznesti qoldaý men qorǵaýdyń birqatar máselesin talqylady, dep habarlaidy "Ult aqparat".
Kezdesýde ekonomikalyq vedomstvo basshysy ulttyq ekonomikany nyǵaitýdaǵy biznes-qoǵamdastyqtyń rólin atap kórsetti.
«Damýdyń negizi – shaǵyn jáne orta biznes. Búgingi tańda ShOB - ekonomikanyń turaqty ósýi men jumyspen qamtýdyń negizgi elementi. Bizdiń mindetimiz - 2025 jylǵa qarai ShOB-tyń JIÓ-degi úlesin 35%-ke, 2050 jylǵa qarai 50%-ke jetkizý. Bul damyǵan elderdiń deńgeiine sáikes keledi», - dedi ministr.
Qabyldanyp jatqan qarjylyq jáne zańnamalyq sipattaǵy memlekettik qoldaý sharalary men biznes ortany odan ári jaqsartý máselesi kezdesýdiń negizgi taqyrybyna ainaldy. Tekserýler men talaptardyń sanyn qysqartý, sondai-aq ruqsat pen anyqtama berý protsesin ońtailandyrý áńgimege ózek boldy.
Jumys kezdesýine qatysýshylar birneshe usynys aitty.
Atap aitqanda, aýyldaǵy múlikti qaita baǵalaý, kreditteý, múmkindigi shekteýli adamdarǵa arnalǵan arnaiy kólikterge salyqtyq jeńildikter, ekologiialyq tólemder, isin jańa bastaǵan kásipkerlerge granttar, jergilikti ózin-ózi basqarý biýdjetiniń tabysyn nyǵaitý jáne týrizmdi damytýǵa qatysty.
Budan basqa, jergilikti kásipkerler satý salyǵynyń jańa jeńildikti rejimine qatty qyzyǵýshylyq tanytyp, qyzmt túrleriniń tizbesin keńeitýdy usyndy.
«Joǵaryda atalǵan máseleler bizdiń Ministrlik qyzmetiniń basym baǵyty bolyp tabylady. Bizdiń maqsatymyz – otandyq biznesti damytýǵa qolaily jaǵdai jasaý», - dedi Dálenov.
Sonymen birge, Kókshetaý qalasynda Ulttyq ekonomika ministri qysh kirpish óndiretin «ENKI» kásipornynda bolyp, avtomattandyrylǵan tehnologiialyq óndiris úderisimen jáne shyǵarylatyn ónim jelisimen tanysty.
Zaýyt 2010 jylǵy jeltoqsanda iske qosyldy. Búginde kásiporynda 250-den astam qyzmetker eńbek etedi.
Jyl saiyn zaýyt 60 mln keramikalyq kirpish óndiredi jáne ónimdilikti arttyrýǵa nietti.
Kásiporynda jylyna 30 mln kirpish shyǵaratyn jańa tseh qurylysy júrgizilýde.
